Биыл облыста заңсыз айналымнан 185 кг түрлі есірткі заттары тәркіленді, 65 сайт пен аккаунт бұғатталды, олар арқылы есірткі таратылып, жарнамаланған.

Қарағанды облысының әкімі Ермағанбет Бөлекпаев жастар ісі жөніндегі кеңестің отырысында нашақорлықтың алдын алудың жаңа әдістерін іздеуді тапсырды. Ол белгілі қарағандылықтарды, қоғам белсенділері мен кәсіпкерлерді психотроптық заттардың таралуына қарсы іс-қимыл жөніндегі жұмысқа белсенді қатысуға шақырды.

– Бұл проблема үндемей қоя салатын мәселе емес. Жаһандық мәселе. Нашақорлыққа қарсы профилактикалық жұмысты күшейту қажет, – деді Ермағанбет Бөлекпаев. – Көптеген жасөспірімдер өз әрекеттерінің салдарын түсінбейді немесе дұрыс бағаламайды, бір рет қолданнан ештеңе болмайды деп санайды. Оларға, әрине, теріс жолға салынған ортасы, ата-аналарының назарынан тыс қалуы әсер етеді. Біз жастарға балама ұсынуымыз керек, оларды пайдалы іс-шаралармен, спортпен немесе басқа да бос уақыттарын қызықты ететіндей шаралармен баурап алуымыз керек.

Полиция қызметкерлері есірткі мен психотроптық заттардың айналымына қарсы белсенді күрес жүргізуде. Алайда бұл жеткіліксіз, деп атап өтті әкім. Ол облыс тұрғындарының күш-жігерін біріктіруге шақырды.

– Статистикаға сәйкес, есірткінің дәмін алғаш татып көру 15–17 жаста болады. Нашақорлыққа қарсы іс-қимыл жөніндегі жұмысқа барлық полиция қызметтері, жұртшылық пен еріктілер жұмылдырылған. Биыл есірткі қылмысына қарсы іс-қимыл бөлімшелерінің қызметкерлері заңсыз айналымнан 185 кг түрлі есірткі, оның ішінде синтетикалық заттарды тәркіледі, – деді Қарағанды облысы ПД бастығының орынбасары Құрманғали Исмағұлов. – Есірткіні тарату және жарнамалауды жүзеге асырған 65 сайт пен аккаунт бұғатталды.

"Қарағанды жастары" Жастар ресурстық орталығының қызметкерлерімен бірлесе отырып, тәртіп сақшылары есірткі заттарын жарнамалайтын және насихаттайтын 700-ден астам жазба мен граффитиді жойды. Сондай-ақ олар 100-ден астам ойын-сауық мекемелерінің басшыларымен есірткі және психотроптық заттардың таралуына жол бермеуге қатысты ынтымақтастық туралы меморандумдар жасасты.

Өткен оқу жылында оқушылар арасында есірткі және психотроптық заттардың заңсыз айналымы, сондай-ақ олардың зияны үшін қылмыстық жауапкершілік туралы бейнероликтер көрсетіліп, мыңнан астам дәрістер мен әңгімелер өткізілді.

Екі апта бұрын облыстық полиция департаментінің базасында еріктілер қозғалысы форумы өтті, оған екі мыңнан астам оқушы мен студенттер қатысты. Іс-шарада құқық бұзушылықтардың, оның ішінде нашақорлықтың алдын алу бойынша одан әрі бірлескен жұмыс формуласы әзірленді. Жастар үшін салауатты өмір салтын насихаттауға бағытталған белгілі тұлғалардың қатысуымен бірқатар бұқаралық спорттық іс-шаралар жоспарланған.

Қарағанды облысының әкімдігі

Ақпарат көзі: ГУ «Отдел государственных активов и закупок города Сарани»