Қарағанды облысының әкімі Ермағанбет Бөлекпаев пен Иран Ислам Республикасының Қазақстандағы елшісі Али Акбар Джокар ынтымақтастықты нығайту және әріптестікті кеңейту мәселелерін талқылады.

Өңір басшысы Қарағанды облысының өнімдері әлемнің 46 еліне экспортталатынын атап өтті. Өңірде Ираннандық серіктестермен бірлескен 25 кәсіпорын жұмыс істейді. Олар өңдеу өнеркәсібінде, көтерме және бөлшек саудада, әкімшілік және көмекші қызмет көрсету және құрылыс саласында жұмыс істейді.

– Біз өзара тиімді сауда – экономикалық ынтымақтастықты арттыруға мүдделіміз және Ираннан келген компаниялар үшін бірлескен жобаларды іске асыру үшін қолайлы жағдай жасауға дайынбыз, – деді Ермағанбет Бөлекпаев. – Инвесторларды, озық әлемдік технологияларды тарту, өнімнің жаңа түрлерін әзірлеу және өндіру, жоғары технологиялық салаларды дамыту үшін облыс аумағында "Сарыарқа"арнайы экономикалық аймағы құрылды. Резиденттер үшін салықтық және кедендік преференциялар, сондай-ақ қажетті инфрақұрылым көзделген. Сондай-ақ, Саран қаласында жалпы ауданы 180 га индустриялық аймақ бар, оның ішінде 150 га жобалар іске асырылуда.

Осы жылдың басынан бері Иранмен сыртқы сауда айналымы 2,1 млн АҚШ долларын құрады.  Елшінің айтуынша, алдағы жылдары бұл соманы едәуір ұлғайту жоспарлануда.

– Бізді Қарағанды облысының әлеуеті қызықтырады, – дейді Әли Акбар Джоукар. – Мұнда көмір, болат, темір өндіріледі, ауыл шаруашылығы дамыған, мал өсірушілер ерекше жетістікке жетті. Өнімдеріңіз біздің елде үлкен сұранысқа ие болуы мүмкін.

Елші Қазақстан үшін Иран арқылы Африка елдеріне логистикалық транзит жүргізу мүмкіндігі бар деп есептейді.

Ақпарат көзі: ГУ «Аппарат акима Карагандинской области»