ESIL UNIVERSITY 25 ЖЫЛДЫҒЫН АТАП ӨТТІ

  Esil University 25 жылдық мерейтойына орай ҚР Ғылым және жоғары білім министрі Саясат Нұрбек, ҚР Парламенті Мәжілісінің Әлеуметтік-мәдени даму комитетінің төрағасы Асхат Аймағамбетов, ҚР Парламенті Мәжілісінің депутаты Берік Бейсенғалиев, ҚР Ұлттық Банкінің бірінші төрағасы Ғалым Байназаров, Астана қаласы әкімінің орынбасары Ерік Мейірхановтың қатысуымен салтанатты шара өтті.

  ҚР Ғылым және жоғары білім министрі Саясат Нұрбек өз сөзінде: «Адам болмысы үшін ағартушылық жолында еңбек ету, білім беру – ең үлкен игілік. Сондықтан ең бірінші профессор-оқытушылық құрамды ұстаздар мерекесімен құттықтағым келеді. Қазіргі таңда Үкімет тарапынан Президенттің бірқатар бастамалары жүзеге асырылып жатыр. Оның ішінде жоғары білімге аса үлкен мән берілген. Сондай-ақ ғылымды қаржыландыру да жылдан-жылға өсуде. Өздеріңіз куә болғандай, Esil University инфрақұрылым, цифрлық даму, ішкі білім сапасы, халықаралық аккредитация, серіктестік бағыттарында өзін жан-жақты көрсетуде. Жоғары білімді дамыту мақсатында біз қолдан келгенше оқу орындарын қолдауға дайынбыз», - деді.

  Іс-шарада ғылым саласына еңбегі сіңген оқытушылар мен профессорлар Ғылым және жоғары білім министрлігінің «Ахмет Байтұрсынұлы», «Ғылымды дамытуға сіңірген еңбегі үшін» төсбелгісімен, «Еңбек ардагері» медалімен марапатталды.

  Салтанатты шара аясында Esil University ректоры Аяпберген Таубаев сөз алып, университеттің 25 жылдығына орай 25 елеулі жетістігін тізіп берді. Сондай-ақ қатысушыларға халық ансамблі, би театры, халықаралық байқаулардың лауреаттары және университет өнерпаздары өнер көрсетті.

Ақпарат көзі: Қазақстан Республикасы Ғылым және жоғары білім министрлігі