Биылғы жылы Алматы облысында мерекеге орай Қонаев қалалық мәдениет үйінде салтанатты шара өтті. Оған облыс әкімі Марат Сұлтанғазиев, Қазақстан Республикасы Мемлекеттік қызмет істері агенттігінің департамент басшысы және облыстық Әдеп жөніндегі кеңес төрағасы Әрсен Жақыпов, сондай-ақ әкімдіктің түрлі басқармалары мен бөлім басшылары қатысты.

Облыс әкімі Марат Сұлтанғазиев -«Мемлекеттік қызмет – халық пен қоғам үшін қызмет ету. Бұл ерекше мамандық» – деп, Қасым-Жомарт Тоқаевтың сөзін алға тартты.

Облыста қазіргі таңда 4 мыңнан астам мемлекеттік қызметші жұмыс істейді, олардың орташа жасы 40 жасты құрайды. Мемлекеттік қызметке жастарды тарту және жауапты қызметтерге білікті мамандарды тағайындау үшін, өңірлік кадрлық резерв жобасы жүзеге асырылуда. Өңірде мемлекеттік қызметшілердің сапасы ұдайы жақсарып келеді. Қазіргі уақытта олардың арасында:

• «Болашақ» бағдарламасының 9 түлегі• Қазақстан Республикасы Президентінің жанындағы Мемлекеттік басқару академиясының 10 түлегі• 2 ғылым докторы• Президенттік жастар резервінен 1 қызметкер тағайындалды

«Барлық мемлекеттік қызметкерлерді кәсіби мерекелерімен құттықтаймын, баршаңызға зор денсаулық, абыройлы қызмет және отбасыларыңызға амандық тілеймін», - деді Марат Сұлтанғазиев.

Шара барысында ерекше көзге түскен мемлекеттік қызметшілерге марапаттар табыс етілді. «Үздік мемлекеттік қызметші» төсбелгісімен білім басқармасы басшысының орынбасары Гүлжан Елубаева, Кеген ауданы әкімінің орынбасары Кеңес Қабылбеков және облыс әкімі аппаратының біріңғай персоналды басқару қызметінің бас инспекторы Орал Нүсіпова марапатталды. Жоғары көрсеткіштер үшін Құрмет грамоталарын Алатау қаласы әкімінің орынбасары Нұрлан Әбілов, бірқатар ауылдық округ әкімдері, сондай-ақ бөлім басшылары мен түрлі саланың бас мамандары алды.

Әрсен Жақыпов өз сөзінде мемлекеттік қызметтің ерекше маңыздылығына тоқталды: «Біздің біліміміз бен тәжірибеміз халық игілігіне қызмет етуі тиіс – бұл қоғам мен мемлекет тарапынан көрсетілген ерекше сенімнің белгісі , ізгілік пен тыныштық, даналық пен сабырлық осы игі іске бағышталуы тиіс».

Қазіргі уақытта мемлекеттік қызмет туралы заңнамаға мемлекеттік қызметшілердің жұмыс сапасын арттыруға бағытталған өзгерістер енгізілді. Сондай-ақ:Қазақстан Республикасы Президентінің жанындағы Академияны бітірген магистранттар мен докторанттар бір жыл ішінде конкурссыз барлық өңірлердегі бос лауазымдарға орналаса алады. Жоғары оқу орындарын грантпен бітірген түлектер бір жыл ішінде конкурс өткізбей-ақ ауылдық, аудандық деңгейдегі төменгі лауазымдарға тағайындалуы мүмкін.

Осы өзгерістердің арқасында қазірдің өзінде облыстағы мемлекеттік органдарда сертификатталған 17 маман жұмыс істеп жатыр. Сондай-ақ, конкурс өткiзiлмей, уәкiлеттi органмен келiсiм бойынша 12 мемлекеттiк қызметшi облыстық басқармалардың басшылары лауазымдарына тағайындалды.

Ақпарат көзі: ​ГУ «Аппарат акима Алматинской области»