Астанада 120-дан астам зерттеуші, ғалымдар, тұрақты энергетика саласындағы ғылыми-зерттеу институттарының, университеттердің және басқа да ұйымдардың өкілдері «Орталық Азиядағы Horizon Europe бағдарламасы: тұрақты энергетика саласындағы озық зерттеулер мен ынтымақтастықты ілгерілету» өңірлік воркшопына жиналды.

Воркшоп спикерлері Еуропалық зерттеулер және инновациялар жөніндегі комиссияның Бас директоратының өкілі Кремена Милева, «Орталық Азиядағы Тұрақты энергетикалық байланыстар (SECCA)» Еуропалық Одақ жобасының өкілдері Шатиришвили Наталья, Пуриня Илзе, Глушук Адам, Польша Ұлттық ғылыми қоры директорының орынбасары Мария Шмиетанка, сондай-ақ Бельгия, Нидерланды, Германия, Қазақстан, Қырғызстан және Өзбекстан сарапшылары мен ғалымдары қатысты.

Кездесу бағдарлама туралы, атап айтқанда оның 5 кластері «Климат, энергетика және ұтқырлық» туралы, сондай-ақ оның аймақтағы зерттеу қауымдастығына ұсынатын мүмкіндіктері туралы хабардарлықты арттыруға бағытталған. Орталық Азиядағы мүдделі тараптардың басымдықтарына сәйкес келетін қаржыландыру схемалары, жобалары мен бастамалары көрсетілді.

Воркшоп аясында ҚР Ғылым және жоғары білім вице-министрі Дархан Ахмед-Заки Еуропалық Одақтың «Орталық Азиядағы орнықты энергетикалық байланыстар (SECCA)» жобасының өкілдерімен, Еуропалық зерттеулер және инновациялар жөніндегі комиссияның Бас директоратының өкілімен, ЕО Horizon Europe бағдарламасының жобаларының үйлестірушілерімен кездесті.

Кездесу барысында Қазақстанда Horizon Europe бағдарламасын дамытуды қолдау мүмкіндіктері талқыланды. Вице-министр ҚР Ғылым және жоғары білім Министрлігінің жоғары білім беруді дамыту жөніндегі жоспарлары мен пайымдауларымен бөлісті.

«Біз Қазақстанның Horizon Europe бағдарламасының қауымдастырылған мәртебесіне қол жеткізу жөніндегі ниетін растаймыз. Ғылым қоры Қазақстандағы Horizon Europe бағдарламасының елдік үйлестірушісі болып белгіленді. Қараша айында біздің делегация NCP Horizon Europe үйлестірушілерінің 5-ші жыл сайынғы жиналысына қатысу үшін Брюссельге барды.

Ақпарат көзі: Қазақстан Республикасы Ғылым және жоғары білім министрлігі