Осы жылы Кербұлақ өңіріндегі 7 елді мекеннің жолдары орташа жөндеуден өтуде. Бүгін осы ауданның халқымен болған кездесу жиынында Жетісу облысының әкімі Бейбіт Исабаев осылай деді, - деп хабарлайды Жетісу облысы әкімінің баспасөз қызметі.

- Биыл ауданның 7 елді мекенінде - Шанханай, Қазынсу, Көксай, Көксу, Қоянкөз, Қызылжар, Шұбар ауылдарында ұзындығы 28,5 шақырым болатын 33 көшеге орташа жөндеу жасалып жатыр. Сонымен қатар Қарашоқы, Қызылжар ауылдарына кіреберіс облыстық маңызы бар жолдар орташа жөндеуден өткізілуде. Бұл жұмыстардың бәрі 2025 жылдың қараша айында бітеді деп жоспарланған, - деді Б. Исабаев.  

Республикалық маңызы бар жолдардың жайына тоқталсақ, өткен жылы жалпы ұзындығы 65 шақырым «Сарыөзек – Көктал» автожол учаскелері жөнделсе, биыл «Сарыөзек ауылын айналып өту» 0-7 және «Сарыөзек – Көктал» 0-45 шақырымдары мен Сарыөзектен Арқарлы асуына дейінгі аралықтарда автомобиль жолдарын жөндеу жұмыстары басталған, бұл жұмыстар келесі жылы аяқталады деп межеленіп отыр. Жалпы ауданның аумағынан 174 шақырым республикалық маңызы бар автомобиль жолдары өтеді. Бұл жолдардың 70%-ға жуығы жақсы және қанағаттанарлық жағдайда.

Сонымен қатар облыс әкімінің айтуынша, тұрғындардың өтінішін ескерген «Алацем» зауыты 37 шақырым болатын техникалық жол салмақшы. Оның құрылысы келесі жылдың соңына дейін аяқталады деп межеленген. Сондай-ақ ауыр жүк көліктерінің нормативтік шамадан тыс жүктелуін болдырмау үшін қазан айының соңына дейін «Қазавтожол» мекемесі «Сарыөзек-Көктал» автожолының 51-ші шақырымына және келесі жылы 6-шы шақырымына автоматтандырылған өлшеу жүйелерін орнататын болады.

Жалпы облыста жақсы және қанағаттанарлық жағдайдағы жолдың үлесі 93%-ды құрайды.

Жетісу облысы әкімінің баспасөз қызметі.

Фотограф: Жеңіс Ысқабай

Ақпарат көзі: Жетісу облысының әкімдігі