МАТЕРИАЛТАНУ, IT ЖӘНЕ ЭНЕРГЕТИКА САЛАСЫНДАҒЫ ШҚУ ИННОВАЦИЯЛАРЫ ТАНЫСТЫРЫЛДЫ

  Өңірде ғылымды дамыту үшін С.Аманжолов атындағы Шығыс Қазақстан университет базасында «Shygys Bastau» технопаркі құрылды. Нысанның негізгі қызметі ғылыми коммерцияланған жұмыстарды және стартап жобаларды қолдауға бағытталған.

  Қазіргі уақытта технопарк базасында бірнеше жоба іске асырылуда. Атап айтқанда, «Ғылым қоры» АҚ қолдауымен «Су объектілерін тазарту үшін композициялық сүзгі материалдарын өндіру технологиясын коммерцияландыру», «Ерекше білім беру қажеттіліктері бар балаларды психологиялық-педагогикалық даярлау және әдістемелік-технологиялық қолдау жөніндегі құзыреттер орталығы», сондай-ақ «Климаттың жаһандық өзгеруі жағдайында Қазақстанның агроценоздарының су режимін мониторингілеу және болжау» гранттық қаржыландыру жобасы.

  - Бүгінгі таңда ғылым және технологиялық саясат аясында көптеген жаңа зертханалар, жаңа кабинеттер ашылып жатыр. С.Аманжолов атындағы ШҚУ-дағы ғылым мен өндірісті дамытуға арналған ауқымды бастамалар өңірлік ғылымды дамытуға зор үлес қосады. «Shygys Bastau» технопаркі студенттер мен магистранттарға тек теориялық білім беріп қана қоймай, өндіріспен өте тығыз байланыста болуға мүмкіндік береді, - деді ҚР Ғылым және жоғары білім министрі Саясат Нұрбек.

  Осы жобалар аясында университет ғалымдары мен өнертапқыштары зерттеу, талдау, болжау және тіпті өндіріспен айналысады. Технопарк қабырғасында ерекше білім беру қажеттіліктері бар балаларға арналған арнайы жиһаз жасалады. Оның қатарында парталар, вертикализатор-орындық, логопедиялық үстел және т.б. бар.

  «Shygys Bastau» технопаркі жетекшісінің орынбасары Алмасбек Мәуліт технопарктің білім алушылар үшін стартап-жобалар құра алатын, тәлімгерлерден кеңес алатын және ғылыми өнімдер өндірісіне қатыса алатын маңызды практикалық алаң болып табылатынын атап өтті.

  Бүгінде технопарк Үндістан, Малайзия, Түркия және Польшадан келген шетелдік серіктес жоғары оқу орындарымен ынтымақтасады, бұл халықаралық ғылыми консорциумдар құруға және гранттық қаржыландыруға өтінімдер беруге ықпал етеді.

Ақпарат көзі: Қазақстан Республикасы Ғылым және жоғары білім министрлігі