МИНИСТР САЯСАТ НҰРБЕК CERN (ЕУРОПАЛЫҚ ЯДРОЛЫҚ ЗЕРТТЕУЛЕР ОРТАЛЫҒЫ) ДЕЛЕГАЦИЯСЫМЕН КЕЗДЕСТІ

  ҚР Ғылым және жоғары білім министрі Саясат Нұрбек Еуропалық ядролық зерттеулер орталығының (CERN) халықаралық байланыстар жөніндегі директоры Шарлотта Варакаулемен және CERN халықаралық қатынастар бөлімінің кеңесшісі Тадеуш Куртыкамен кездесті.

  ҚР Энергетика министрлігіне қарасты Ядролық физика институты өкілдерінің қатысуымен өткен кездесуде қазақстандық ғалымдардың ғылыми эксперименттерге қатысуы, CERN-дегі қазақстандық мамандарға арналған оқыту және тағылымдама бағдарламаларын қамтитын екіжақты ынтымақтастықтың негізгі аспектілері талқыланды.

  Ведомство басшысы CERN-мен стратегиялық әріптестіктің маңыздылығын атап өтті, оның шеңберінде қазақстандық ғалымдар мен зерттеу институттары CERN-нің әртүрлі ғылыми бағдарламаларына, мысалы, Үлкен адрон коллайдеріндегі эксперименттерге қатысу мүмкіндігіне ие, бұл озық білім мен технологияларды Қазақстанға беруге ықпал етеді.

  Сонымен қатар кездесу барысында министр Мемлекет басшысының еліміздің ғылыми әлеуетін жан-жақты дамытуға бағытталған отандық ғылым саласындағы реформалары туралы айтып берді.

  CERN делегациясының басшысы Шарлотта Варакауле Қазақстанның ғылыми және технологиялық саясатын жаңғыртудағы оң өзгерістерді, сондай-ақ Қазақстанда шетелдік жоғары оқу орындарының филиалдарын ашу бойынша жүргізіліп жатқан жұмыстарды жоғары бағалады.

  Талқылаудың маңызды тақырыбы Қазақстанның CERN-мен ынтымақтастығын дамыту, қазақстандық ғалымдар мен инженерлер үшін қысқа мерзімді және ұзақ мерзімді тағылымдамалар бағдарламаларын кеңейту, CERN-де студенттер мен ғылыми қызметкерлер үшін жазғы мектептерді өткізу, жоғары энергетикалық физика және үдеткіш технологиялары саласындағы бірлескен білім беру бағдарламалары болды.

  Соңында Саясат Нұрбек CERN делегациясына алғысын білдіріп, екіжақты ынтымақтастықты одан әрі табысты дамытуға үміт білдірді.

  Айта кетейік, екі жақтың ынтымақтастығы 2010 жылдардан бастап бірнеше бағыт бойынша дамып келеді. 2018 жылы Қазақстан мен CERN ғылыми және техникалық салалардағы ынтымақтастық туралы келісімге қол қойды. Бұл келісім жоғары энергетикалық физика, ядролық физика және үдеткіш технологиялары саласындағы өзара әрекеттесуді дамытуға бағытталған. Ол қазақстандық ғалымдар мен зерттеу институттарының CERN базасында Үлкен адрон коллайдеріндегі жобалар сияқты халықаралық эксперименттерге қатысуына мүмкіндік береді.

Ақпарат көзі: Қазақстан Республикасы Ғылым және жоғары білім министрлігі