Облыс әкімі Берік Уәли жұмыс сапарымен Аягөз ауданына барды. Аймақ басшысы Ақтоғай, Қопа ауылдарындағы әлеуметтік нысандарды аралап, Ақтоғай кен орнында болды.Ақтоғай - аудандағы ең ірі елді мекендердің бірі. Ауылда 2 мектеп бар.Облыс әкімі кенттегі жалпы орта білім беретін мектептің жұмысымен танысты. Білім ордасы 1961 жылы салынған. Қазіргі таңда 423 оқушы оқиды, 110 мұғалім жұмыс істейді.Мектептегі өзекті мәселенің бірі - бала санының көптігі. Білім ордасы 220 орынға шақталғанымен бүгінде мұнда 400-ден астам оқушы білім алуда. Мәселені шешу үшін мектеп жанынан 240 орындық жапсаржай салу қажеттігі туындап отыр. Бұл мәселе бірнеше рет көтерілгенімен, аяқсыз қалған. Мектеп директоры облыс әкіміне осы проблеманың шешілуіне қолдау көрсетуді сұрады.Аймақ басшысы мәселені шешу жолдары қарастырылатынын айтып, аудан әкіміне мектепке жапсаржай салу бойынша тиісті құжаттарды әзірлеп, ұсынуды тапсырды.Облыс әкімі мектепте Ақтоғай ауылының ақсақалдарымен, белсенді азаматтармен кездесіп, елді мекеннің өзекті мәселелеріне назар аударды. Тұрғындар ауылды ауыз сумен, электрмен жабдықтауға қатысты проблемаларды алға тартты.Облыс әкімі Ақтоғай кентінің мәселелерінен хабардар екенін атап өтіп, өзекті проблемалар кезең-кезеңімен шешілетін айтты."Жұмыс сапарымен өңірдің барлық қала-аудандарын аралап шықтым. Бүгін шалғайдағы ауылдардың жағдайымен жақын танысайын, мәселелерін тыңдайын деп арнайы келіп отырмын. Ақтоғай - болашағы зор ауыл. Елді мекеннің іргесінде ірі кен орны тұр. Бұл өз кезегінде ауыл тұрғындарын жұмыспен қамтуға мүмкіндік береді. Кәсіпорын жергілікті мамандарды оқытуға көмектесуге дайын. Кент тұрғындары осы мүмкіндікті пайдаланып, ауыл жастары қайта даярлаудан өтіп, жаңа мамандықтарды меңгергені дұрыс. Бұл ауыл үшін де, кәсіпорын үшін де тиімді. Ал елді мекендегі мәселелер рет-ретімен, жүйелі түрде шешіледі. Әкімдік тарапынан тиісті қолдау көрсетеміз" деді аймақ басшысы.

Ақпарат көзі: Абай облысының әкімдігі