2024 жылы өңірдің әлеуметтік нысандарын жөндеу жұмыстарына барлығы 12,2 млрд теңге бөлінді.

Жөндеу жұмыстарының басым көпшілігі білім беру нысандарында жүргізіледі. 7,4 млрд теңгеге 35 оқу орнына күрделі жөндеу жүргізіледі, оның ішінде 7-і «Ауыл Ел бесігі» бағдарламасы аясында.
Павлодарда 8 мектепті, Екібастұзда 10 мектепті және Ақсу қаласында 1 мектепті күрделі жөндеуден өткізу жоспарлануда. Сондай-ақ, Ақтоғай, Баянауыл, Железин, Ертіс, Май, Павлодар, Успен, Шарбақты және Тереңкөл аудандарының мектептері жөнделеді. Ақсу қаласы және Павлодар мен Аққулы аудандарындағы 3 балабақшаға күрделі жөндеу жүргізілетін болады. Сонымен қатар, Екібастұз қаласындағы үш балабақшаның шатырын жаңарту жұмыстары жүргізілуде.

2024 жылы денсаулық сақтау саласындағы 8 қалалық және 11 аудандық медициналық ұйымға, соның ішінде №3 қалалық аурухананың стационарына, облыстық жедел медициналық көмек станциясына, фтизиопульмонология орталығына, хосписке, тері-венерология диспансеріне, Екібастұз қалалық перзентханасына және т. б. күрделі жөндеу жүргізу көзделген.

Биылғы жылы 17 мәдениет нысанының күрделі жөндеу жұмыстарына және тағы үш нысанды абаттандыруға 2,3 млрд теңге бөлінді.

Спорт саласында 2024 жылы Май ауданының Көктөбе ауылының спорт кешеніне және Ақсу қаласындағы «Достық» стадионына жөндеу жүргізу, «Зеленая роща» шаңғы базасында спортзал салу, «Жасыбай» спорт кешеніндегі бассейннің жылыту жүйесін реконструкциялау, сондай-ақ, Майқайың кентіндегі хоккей нысанын жөндеу жоспарланған.

- Біз қарастырған барлық әлеуметтік нысандар - өте маңызды және өңір тұрғындары күтіп отыр. Сондықтан, сіздердің ешбіріңізді хабардар етпей, жөндеу жұмыстарының барысын жоспардан тыс өзім тексеретін боламын, - деді облыс әкімі.

Асайын Байханов білім беру нысандары бойынша барлық жөндеу жұмыстарын 20 тамызға дейін аяқтауды тапсырды. 30 қыркүйекке дейін – денсаулық сақтау, мәдениет, спорт және әлеуметтік қорғау нысандары бойынша жұмыстар аяқталу керек. Орындалатын жұмыстардың сапасына бақылауды мемлекеттік сәулет бақылау басқармасы, депутаттық корпус және қоғамдық кеңес жүргізетін болады.

Павлодар облысы әкімінің баспасөз қызметі
Суреттерді түсірген Валерий Бугаев

Ақпарат көзі: ГУ «Аппарат акима Павлодарской области»