ПРАКТИКАҒА БАҒЫТТАЛҒАН ОҚЫТУДЫҢ ЖАҢА ҚАДАМЫ: «СОГРА ЖЫЛУ-ЭЛЕКТР ОРТАЛЫҒЫНДА» ШҚТУ ФИЛИАЛЫ АШЫЛДЫ

  Д.Серікбаев атындағы ШҚТУ жаңа оқу-тәжірибелік филиалы «Согра ЖЭО» ЖШС-де ашылды. Тиісті келісімге ШҚТУ ректоры Сәуле Рахметуллина мен «Согра ЖЭО» директоры Ғалым Жаңбыршы қол қойды.

 Бұл келісім – университет пен аймақтың өндірістік кәсіпорындары арасындағы көпжылдық ынтымақтастықтың кезекті нәтижесі, оның мақсаты – облыстың стратегиялық маңызы бар нысандарында жұмысқа бірден кірісуге дайын жоғары білікті мамандар даярлау.

  Жаңа оқу-тәжірибелік филиалының ашылуы ШҚТУ-дың білім беру процесіне озық тәсілдерді енгізудегі тағы бір нәтижесі – практикаға бағытталған оқыту арқылы студенттер университетте теориялық білім алып қана қоймай, сонымен қатар жиған ілімдерін «Согра ЖЭО» сияқты нақты нысандарда қолдана алады. Бұл студенттерге заманауи жұмыс берушілер тарапынан сұранысқа ие құнды тәжірибелік жұмыс өтілімін қамтамасыз етеді, сондай-ақ өндірістік нысандарға жұмысқа кірісу кезінде бейімделу процесін жеңілдетеді.

  - Біздің университетіміздің негізгі қағидаларының бірі – практикалық бағдар, инженерлерді даярлау өндіріс процесімен тығыз байланысты болуы қажет деп санаймыз. Бұл қағиданы біз білім беру бағдарламаларымыз және серіктестерімізбен тұрақты байланыс орнату арқылы жүзеге асырамыз. Осындай кәсіпорындармен, соның ішінде Согра ЖЭО-пен ынтымақтастық өте маңызды, өйткені энергетика саласы үшін кадрларды даярлау – біздің басты бағытымыз деп санаймын, - деді ШҚТУ ректоры Сауле Рахметуллина.

  Айта кету керек, Қасым-Жомарт Тоқаев Қазақстан халқына арнаған Жолдауында энергетика саласындағы инфрақұрылымдық мәселелерді шешу, энергетикалық саланы жаңғырту бойынша ұлттық жобаны бекіту және жаһандық энергетикалық тапшылықтың күшеюі жағдайында елдің ұзақ мерзімді ұлттық мүдделері мен ерекшеліктерін ескеру қажет екенін атап өтті. Ал ШҚТУ филиалы бұл мәселелерді шешуге үлес қосады, себебі ол тек өндірістік тәжірибе алаңы ғана емес, сонымен қатар курстық және дипломдық жобаларды орындауға, энергетика және жылу энергетикасы бағытында оқитын студенттер үшін тағылымдамаларды ұйымдастыруға көмектеседі.

  Өз кезегінде, «Согра ЖЭО» басшылығы Шығыс Қазақстан облысына энергетикалық инфрақұрылымды жаңғырту мәселелерін шешуге және жұмыс істеп тұрған нысандардың жұмысына үздіксіз қолдау көрсетуге қабілеті бар білікті мамандар қажет екенін атап өтті.

 Ал өнеркәсіптік өндірістің өсуі және аймақтың энергетикалық жүйесінің кеңеюі жағдайында болашақта бұл салада кадрларға деген сұраныс тек арта түседі.

  Сондықтан ШҚТУ-дың «Согра ЖЭО» ЖШС-дегі тәжірибелік-оқу филиалының ашылуы – бұл тек академиялық қадам ғана емес, сондай-ақ өңірдің энергетика саласындағы мамандарға деген қажеттілігін қанағаттандыруға бағытталған стратегиялық шешім. Филиалдың арқасында университет Шығыс Қазақстан кәсіпорындарын бірегей білім мен дағдыларға ие білікті кадрлармен қамтамасыз ете алады.

Ақпарат көзі: Қазақстан Республикасы Ғылым және жоғары білім министрлігі