Қасым-Жомарт Тоқаев бұл мемлекеттік сапардың басты мақсаты достыққа және өзара қолдауға негізделген қазақ-тәжік қатынастарын мүлдем жаңа деңгейге көтеруді көздейтін ортақ мұратқа сай келетінін айтты. Осы орайда Мемлекет басшысы бүгін қол қойылатын Қазақстан Республикасы мен Тәжікстан Республикасы арасындағы Одақтастық қатынастар туралы шарттың айрықша маңызына назар аударды.

– Аталған тарихи құжат көкжиегімізді кеңейтіп, көпжақты байланыстарымызды одан әрі нығайтудың негізін қалайды. Одақтастық қатынастарды дамыту жолындағы бірлескен әрекетіміз тұтас Орталық Азия өңірінің орнықты дамуы мен тұрақтылығын қамтамасыз етуге ықпал етеді,– деді Президент.

Мемлекет басшысы қазақ-тәжік ынтымақтастығы барлық бағытта қарыштап дамып келе жатқанын айтты.

Өз кезегінде Тәжікстан Президенті Эмомали Рахмон одақтастық қатынастар туралы шартқа қол қою ұзақ мерзімді перспективада мемлекетаралық ынтымақтастықты сапалы нығайтатынын атап өтті.

Кездесу барысында агроөнеркәсіп, су-энергетика, көлік-транзит салаларындағы екіжақты ынтымақтастықты одан әрі нығайтудың басымдықтары мен міндеттері айқындалды. Тараптар бірлескен жобаларды іске қосуға күш-жігерін жұмылдыруға, сондай-ақ бизнесті жүргізу үшін қолайлы жағдайлар жасауға уағдаласты.

Келіссөздер қорытындысы бойынша Қасым-Жомарт Тоқаев пен Эмомали Рахмон Қазақстан Республикасы мен Тәжікстан Республикасы арасындағы Одақтастық қатынастар туралы шартқа қол қойды.

Сонымен қатар, мемлекеттік сапар аясында 15 меморандумға қол қойылды.Оның ішінде Қазақстан Республикасы Ауыл шаруашылығы министрлігі мен Тәжікстан Республикасы Ауыл шаруашылығы министрлігі арасындағы инновациялық және цифрлық даму, ауыл шаруашылығы кадрларын даярлау және қайта даярлау саласындағы өзара түсіністік туралы меморандум бар.

Ақпарат көзі: Министерство сельского хозяйства Республики Казахстан