QYZPU ДЕЛЕГАЦИЯСЫ WALS 2024 - LESSON STUDY ХАЛЫҚАРАЛЫҚ КОНФЕРЕНЦИЯСЫНА ҚАТЫСТЫ

  Қазақ ұлттық қыздар педагогикалық университеті делегациясы WALS 2024 - Lesson Study дүниежүзілік қауымдастығының халықаралық конференциясына қатысты. Конференция «Сабақты зерттеу: үздік оқу мен оқытуға ұмтылу» тақырыбында өтті.

  WALS 2024 конференциясы – білім беру саласындағы оқу мен оқытудағы жаңашылдықтарды талқылауға арналған халықаралық алаң. Конференцияда QyzPU ректоры Гүлмира Қанай негізгі спикерлер қатарында сөз сөйлеп, Lesson Study бірлескен зерттеулері Қазақстанда университет деңгейінде бірінші болып Қазақ ұлттық қыздар педагогикалық университетінде енгізілгенін айтты.

  Сонымен қатар конференция барысында жас зерттеушілерге арналған секцияда университет магистранттары Рахима Турлибек пен Баян Алтаева өздерінің Lesson Study жобаларын ұсынды.

  Шараға QyzPU 2 курс докторанттары Айман Тургалиева «Lesson Study әдістемесінің сыныптағы этникалық динамикаға ықпал етуі» тақырыбы бойынша, ал Диана Амирова «Студенттердің өмірін құтқару дағдыларын жетілдіру: өмірге қауіп төнетін жағдайларда тиімді әрекет ету үшін ситуациялық міндеттерді модельдеу» тақырыбындағы зерттеуімен бөлісті.

  Университеттің академиялық бағдарламалар және сапа департаментінің директоры Аида Мейркулова, оқытушы Данагүл Кошанова студенттердің жұмысы және арнайы әзірленген Lesson Study рефлексивті күнделікті ұсынды. QyzPU ғылыми жұмыс және халықаралық ынтымақтастық жөніндегі проректоры Закир Джумакулов ұжымның жұмысын қорытындылады.

  Конференция барысында Малайзиядағы Sultan Idris Education University өкілі доктор Мохамад Борхан университеттің Lesson Study әдісін болашақ мұғалімдерді әзірлеу кезеңінде енгізу моделіне қызығушылық танытып, университетпен ынтымақтастық орнатуға ұсыныс білдірді.

  Кембридж университетінің профессоры, әйгілі Lesson Study бойынша жетекшілік еңбектердің авторы Питер Дадли университетте жасалған зерттеулерді бағалап, елімізде болашақ ұстаздарды әзірлеу жүйесінде тиімді әдістерді енгізу аса құнды еңбек екенін атап өтті.

  Университет делегациясының WALS 2024 конференциясына қатысуы QyzPU-дың халықаралық деңгейдегі беделін арттырып, болашақтағы ынтымақтастықтар мен зерттеулердің негізін қалауға септігін тигізеді.

Ақпарат көзі: Қазақстан Республикасы Ғылым және жоғары білім министрлігі