ҚР ҒЫЛЫМ ЖӘНЕ ЖОҒАРЫ БІЛІМ МИНИСТРЛІГІ ҚЫЗЫЛОРДАДА КӘСІБИ БАҒДАР БЕРУ БОЙЫНША КЕЗДЕСУ ӨТКІЗДІ

  Қорқыт Ата атындағы Қызылорда университетінде кәсіби бағдар беру бойынша ата-аналар мен түлектерге арналған кездесу өтті. Жиында Қорқыт Ата атындағы Қызылорда университетінің басқарма мүшесі-стратегиялық даму және IT жөніндегі проректор Махмұт Томанов университеттің артықшылықтары мен стратегиялық дамуы туралы айтты. Кездесуге ҚР Ғылым және жоғары білім министрінің кеңесшісі Руслан Емелбаев және профориентолог Айдос Жұманазаров қатысып, түсіндірме жұмыстарын жүргізді.

  Кездесуде талапкерлердің жоғары оқу орындарына құжат тапсырудың оңтайлы әдістері, мамандық таңдау, гранттардың бөлінісі мен оған түсу ықтималдығын өз бетінше талдау, сондай-ақ мемлекеттік бағдарламалар туралы айтылды. Сонымен қатар халықаралық диплом алу және оқу орнын ауыстыру жолдары да түсіндірілді.

  «Бүгінгі кездесу барысында түлектерге сауалнама жүргіздік. Нәтижесінде, басым бөлігі биология-химия пәндері мен мегаполис қалаларды таңдаған. Сонымен қатар еңбек нарығының сұранысын ескермей, ата-аналар мен бітіруші түлектер білім гранты көп бөлінетін мамандықтарға таңдау жасайды. Біздің мақсатымыз – әрбір оқушының қабілеттілігі мен бейімділігін ескере отырып, болашақ мамандығын саналы түрде таңдауға ықпал ету», - деді Айдос Жұманазаров.

  Жиынға мектеп түлектері және ата-аналар қатысып, сала мамандарына өздерінің көкейкесті сұрақтарын қойды. Қазіргі уақытта Қызылорда облысының аудандарында түсіндірме жұмыстары жалғасуда.

Ақпарат көзі: Қазақстан Республикасы Ғылым және жоғары білім министрлігі