Бүгін ҚР Стратегиялық жоспарлау және реформалар Агенттігінің Төрағасы Жандос Шаймарданов бастаған делегация жұмыс сапарымен Қарағанды облысына барды. Сапардың мақсаты ел деңгейіндегі стратегиялық құжаттардың міндеттерін жүзеге асыруға ықпал ететін өңірлік дамудың перспективалары мен тәсілдерін талқылау болды.

Сапар барысында Агенттік өкілдері «Silk Road Electronics» тұрмыстық техника, «QazTehna» автобустар мен арнайы техника, «TengriTyres» шина зауыты секілді Саран қаласының индустриялық аймағының бірқатар объектілері мен кәсіпорындарына барып, Қарағанды қаласында «ГлобалСити» сауда-логистикалық кешені, «TEEZ» маркетплейсі мен «Terricon Valley» IT-хабының жұмысымен танысты.

Агенттік делегациясы әкімдік өкілдерін кеңістіктік экономикалық модель мысалында облыстарды дамыту тәсілдерімен таныстырды.

Сондай-ақ өңірдің, облыстың нақты аудандары мен ауылдық округтерінің әлеуметтік-экономикалық жағдайын одан әрі нығайту жөніндегі бағдарламаны әзірлеу үшін бірлескен идеялар талқыланды.

Кездесулер қорытындысы бойынша өңірлік даму құзыреттерін арттыру шеңберіндегі ынтымақтастықты жалғастыру туралы уағдаластыққа қол жеткізілді.

Ақпарат көзі: Қазақстан Республикасының Стратегиялық жоспарлау және реформалар агенттігі