СҚО әкімдігі Дін істері басқармасының қолдауымен Қазақстан Республикасының Мәдениет және ақпарат министрлігінің Дін істері комитетінің бес күндік жобасы шеңберінде облыстың бірнеше оқу орындарында оқыту семинары өтті.

Семинарға Манаш Қозыбаев атындағы Солтүстік Қазақстан университетінің, облыстық мамандандырылған мектеп-интернат-олимпиадалық резерв колледжінің студенттері, Әбу Досмұхамбетов атындағы дарынды балаларға арналған облыстық мамандандырылған гимназия-интернатының және Әлихан Бөкейхан атындағы №25 жалпы орта білім беретін мектебінің оқушылары қатысты.

Аталған семинарда «Зайырлылық қағидаты - Қазақстан Республикасының болашағының кепілі» және «Деструктивті діни ағымдардың құрбаны болмау жолдары» сынды тақырыптар қарастырылды.

Жобаның мақсаты - жастардың экстремизмге қарсы санасын қалыптастыру, діни экстремизмге қарсы іс-қимыл мәселелерінде құқықтық және азаматтық жауапкершілік деңгейін арттыру, Қазақстан жастарын радикалды және деструктивті діни ағымдарға тартуға жол бермеу.

Спикерлер ретінде республикалық ақпараттық-түсіндіру тобының мүшесі Л. Н. Гумилев атындағы ЕҰУ дінтану ғылымдарының PhD докторы Толғанай Мұстафина және - СҚО әкімдігінің Дін істері басқармасы КММ-нің бас маманы Нұртас Нұрмағамбет дәріс оқыды.

Сарапшылар діннің рухани-адамгершілік құрамдас бөлігі мәселелеріне, қазіргі қазақстандық қоғамдағы әйелдердің рөлі мен әлеуметтік мәртебесін арттыруға, сондай-ақ деструктивті діни ағымдардың әсеріне қарсы тұру шараларына ерекше назар аударды.

Тыңдаушылар тарапынан да РАТТ мүшелеріне бірқатар сұрақ қойылып, тұщымды жауаптар алынды.

Материал СҚО Терроризмге қарсы комиссия

аппаратының ақпараты негізінде дайындалды

Ақпарат көзі: Қазақстан Республикасының Терроризмге қарсы орталығы