Бүгін СҚО әкімі Ғауез Нұрмұхамбетов Бескөл ауылының тұрғындарымен кездесіп, су тасқынынан зардап шеккендерге көмек көрсету бойынша сұрақтарға жауап беріп, түсіндірме жүргізді. 

"Бүгінгі таңда Қазақстан бойынша бір жолғы төлемді жасау, баспананы беру және жөндеу бойынша ортақ ережелер қабылданған. Біз заң аясында жұмыс жасауымыз қажет. Бұл "қызыл аймаққа" да қатысты. Мен су басу қаупі бар жерден тұрғындардың көшіп кету ниетін түсініп отырмын. Дегенмен, Бескөлдегі үйлер техникалық зерттеудің нәтижесі бойынша  жөнделеді немесе бұзылады , - деп жазды өңір басшысы әлеуметтік желіде. 

Сондай-ақ, Есіл өзенінің жағалауындағы құрылыс жүргізуге тыйым салынған аймақты 100 метрден 1 шақырымға дейін кеңейту туралы ұсыныспен ҚР Парламенті Сенатына хат жолданды.  Бұл мәселелер заңмен реттелуі керек деп атап өтті облыс әкімі. 

Жалпы, облыс бойынша су тасқынынан 3 898 үй зардап шекті, бүгінде тұрғын үйлерді бағалау және техникалық зерттеу бойынша барлық жұмыстар аяқталды.  25 мамырға дейін сметалық есеп, баспананы техникалық зерттеу және бағалау бойынша құжаттамаларды беру аяқталады.

Тұрғын үй мәселесін шешу үшін «Солнечный 2» шағын ауданында 520 үйдің құрылысы жүргізілуде және пәтерлер алынуда. 

Оған қоса, тұрғындарды биылғы су тасқынын ескере отырып  бөгет салу мәселесі де алаңдатып отыр.  

"Мамандардың жобалық шешімі бойынша бөгеттерді салатын боламыз.  Барлық мәселелер менің жеке бақылауымда", - деді СҚО әкімі.

Ақпарат көзі: КГУ «Аппарат акима Северо-Казахстанской области»