Қарулы Күштердің түрлерінде, әскер тектерінде және өңірлік қолбасшылықтарында Конституция күніне орайластырылған іс-шаралар өтуде. 

Әуе қорғанысы күштерінің бас басқармасында 44813 әскери бөлімінің сарбаздары панкратионнан әлем чемпионы және джиу джитсудан спорт шебері Василий Тахтаймен кездесті. 

Достық әңгіме барысында танымал спортшы әскери қызметшілерге жақсы фитнес, жоғары жауынгерлік рухтың құпияларымен бөлісті және өзінің машықтануы мен жалпы дене шынықтыруды жақсарту жөнінде тәжірибелік кеңестер берді. 

– Егер мен сарбаз болсам, онда ең мықты сарбаз болар едім. Кез келген істе, әсіресе әскери істе де әрқашан алға ұмтылу, үлкен мақсаттар қою және оған қол жеткізу қажет, – деді В.Тахтай.

Әуе қорғанысы күштері бас қолбасшысының тәрбие және идеологиялық жұмыс жөніндегі орынбасары полковник Талғат Сыздықов келген қонаққа алғыс айтып, бұл кездесудің сарбаздарды ынталандыру және олардың әлеуетін арттыруда маңызды екенін атап өтті. 

Алматы облысында Конституция күніне орай әскери қызметшілерге спорттық шара ұйымдастырылды. 

Гарнизонның әр әскери бөлімшесінен 5 адамнан 16 команда атынан 80 әскери қызметші 15 шақырымға жүгірді.

Іс-шараға қатысушыларға арнап Қонаев гарнизоны әскери полиция бөлімінің бастығы подполковник Дәурен Тұралин сөз сөйледі. 

– Спорт – әрбір әскери қызметші өмірінің ажырамас бөлігі, ол дене күшін қалыптастырады, ақыл-ой және моральдық қасиеттерді дамытады, ерік-жігерді нығайтып, жауынгерлік мінезді шыңдайды, – деді ол.

Жарыс қорытындысы бойынша бірінші орынды 20030 әскери бөлімінің командасы, екінші орынды 58012 әскери бөлімінің әскери қызметшілері, үшінші орынды 62064 әскери бөлімінің құрамасы алды. Барлық жеңімпаздар мен жүлдегерлерге ақшалай сыйлықтар, медальдар, грамоталар мен кубоктар табыс етілді.

Ақпарат көзі: Министерство обороны Республики Казахстан