Қалалық жинау пунктінде отыз бес әскерге шақырылушыны салтанатты түрде шығарып салу рәсімі өтті. 

Психологиялық тестілеуден, бақылау медициналық тексеруден өткен және қалалық әскерге шақыру комиссиялары оң шешім шығарған жастар жақын арада Ақтау гарнизонының теңіз жаяу әскерлері бригадасында әскери істің негіздерін зерделеуге кіріседі. 

Азаматтарды әскерге шығарып салуға әкімдік өкілдері, Қарулы күштердің, Ауған соғысы мен жергілікті қақтығыстардың ардагерлері, сондай-ақ «Аналар жүрегі» сарбаздар аналары комитеті» РҚБ өкілі Шарифа Муминова келді. 

– Әскери қызмет сендер үшін өмірдің маңызды кезеңі болмақ, әскерде сендер әскери-есептік мамандық меңгеріп, нағыз Отан қорғаушы боласыңдар, – деді Шымкент қаласының қорғаныс істері жөніндегі департаментінің бастығы полковник Әбдіғабит Шегебаев. 

Әскерге шақырылушыларға арнап Қарулы күштер ардагерлері қалалық кеңесінің төрағасы отставкадағы полковник Серікбай Онбаев сөз сөйледі. 

– 18 бен 27 жас аралығындағы әрбір ер адам өзін шыңдайтын армия мектебінен өтуге міндетті. Шынында нағыз достықтың құндылығын түсінбей, жас жігітке болашақта қандай да бір нәтижеге қол жеткізу қиын. Жыл сайын жүздеген шымкенттікті шығарып салып, күтіп аламыз. Өз көргенімді айтайын, балалар әскерге жеткіншек  боп барып, нағыз шыныққан жігіт болып оралады. Отанды абыроймен қорғап, адал қызмет етіңдер, – деді.

Әскерге шақырылушыларды әкетуге келген әскери бөлімнің гвардия капитаны Бексұлтан Алдаберген ата-аналар мен жиналған қонақтарымен амандасып, бригаданың бай тарихы мен жауынгерлік жолы туралы айтты.  

– Жуырда балаларыңыз нағыз әскери тәртіпке үйреніп, өмірге деген көзқарастары өзгереді. Әскерде олар көп нәрсені үйренеді. Қызмет барысында алған дағдылары болашақта кәдеге жарарына күмәнім жоқ. Әскерге алынғандарға қиындықтан қорықпай, өздеріңнің болашақтарыңа керек тәжірибені жинаңдар деген тілегім бар, – деп қорытындылады офицер.  

Құрметті қонақтар мен туыстардан басқа, болашақ жауынгерлерді қолдауға әскери-техникалық мектептің, «Жас сарбаз» әскери-патриоттық сыныптарының тәрбиеленушілері, қала жастары, сондай-ақ гарнизон әскери оркестрінің музыканттары келді.  

Айта кету керек, бүгінгі таңда күзгі шақыру науқаны аясында Шымкенттен ҚР ҰҚК Шекара қызметінің қатарына 200 азамат шақырылды. Жалпы, осы жылдың 31 желтоқсанына дейін қаладан 1000-нан астам адам әскерге жіберіледі.

Ақпарат көзі: Министерство обороны Республики Казахстан