Ақмола облысы әкімдігі жанындағы сыбайлас жемқорлыққа қарсы іс-қимыл жөніндегі ведомствоаралық комиссия отырысында тұрғын үй-коммуналдық шаруашылық саласындағы және құрылыс нысандарындағы сыбайлас жемқорлық тәуекелдерін жою шаралары талқыланды.

Жиынды ашқан Ақмола облысының әкімі Марат Ахметжанов мемлекеттік органдардың басты міндеті – халықтың әл-ауқатын арттырып, өмір сапасын жақсарту екенін атап өтті.

«Бұл ретте біз үшін басты бағыт – Агенттік әзірлеген сыбайлас жемқорлық тәуекелдерінің картасы. Қазіргі таңда өңірлік картаға тұрғын үй-коммуналдық шаруашылық саласы мен проблемалық құрылыс нысандары енгізілді. Осы тәуекелдерді азайту мақсатында облыс әкімдігі мен Сыбайлас жемқорлыққа қарсы қызмет департаменті бірлесіп, аталған салаларға сыртқы талдау жүргізді», – деп атап өтті аймақ басшысы.

Өңірдегі сыбайлас жемқорлық тәуекелдерін анықтау жұмыстары жөнінде Сыбайлас жемқорлыққа қарсы іс-қимыл агенттігі департаментінің басшысы Асхат Оразхан баяндама жасады.

«Талдау барысында нормативтік-құқықтық базаның жетілмегендігі, бюджет қаражатының тиімсіз жұмсалуы, цифрландыру мен автоматтандыру деңгейінің төмендігі сияқты бірқатар тәуекелдер анықталды. Осы мәселелерді шешу үшін нақты ұсыныстар әзірленіп, тиісті жоспар жасалды. Сондай-ақ өңірдегі инфрақұрылымдық құрылыс нысандарын аяқтау бойынша Жол картасы бекітілді. Бұл картаға құрылыс мерзімі созылып кеткен 26 су құбыры, 3 газдандыру және 2 электрмен жабдықтау нысаны енгізілді. Әр нысанның қазіргі жағдайы, қажетті жұмыстар және аяқтау мерзімі белгіленді», – деді департамент басшысы.

Сонымен қатар, спикер сыбайлас жемқорлыққа қарсы комплаенс бағыты бойынша атқарылған жұмыстарды баяндап, облыстық құрылыс, сәулет және қала құрылысы басқармасы, экономика басқармасы мен Сыбайлас жемқорлыққа қарсы қызмет департаменті өкілдерінен тұратын арнайы комиссия құруды ұсынды. Бұл комиссияның міндеті – жауапты тараптардың есептерін тыңдап, бюджет қаражатының мақсатсыз жұмсалуына жол бермеу және жобалардың уақытылы әрі сапалы орындалуын қадағалау.

Тұрғын үй-коммуналдық шаруашылық, жолаушылар тасымалы, автомобиль жолдары және тұрғын үй инспекциясы салаларында сыбайлас жемқорлыққа қарсы қабылданған шаралар туралы Көкшетау қаласының әкімі Ануар Кумпекеев, тұрғын үй-коммуналдық шаруашылық басқармасының басшысы Бақтыбек Жапаев және құрылыс, сәулет және қала құрылысы басқармасының басшысы міндетін атқарушы Азамат Байқуанышев баяндама жасады. Ал сыбайлас жемқорлыққа қарсы бағытталған мемлекеттік әлеуметтік тапсырыстардың орындалуы жөнінде ішкі саясат басқармасының басшысы Гүлмира Каримова мәлімдеді.

Жиынды қорытындылаған облыс әкімі жауапты тұлғаларға көтерілген мәселелер бойынша нақты шаралар қабылдап, орын алған кемшіліктерді жою жөнінде тапсырма берді.

«Мемлекет басшысы атап өткендей, біз жылдам, батыл әрі стандартты емес шешімдер қабылдауымыз керек. Құқық қорғау органдарымен тығыз жұмыс жүргізілуде. Біздің басты мақсатымыз – азаматтардың әл-ауқатын арттыру», – деп түйіндеді сөзін Марат Ахметжанов.

Ақпарат көзі: ГУ «Аппарат акима Акмолинской области»