Төмен көміртекті экономика технологияларын коммерцияландыру саласындағы ынтымақтастық

  Бұған дейін қол жеткізілген уағдаластықтарды іске асыру шеңберінде Ғылым қорының бірлескен ғылыми-инновациялық жобалардың перспективаларын талқылауға және жасыл технологиялар саласындағы әріптестікті нығайтуға бағытталған Шанхай ғылым және технологиялар саласындағы алмасу орталығының (SSTEC) өкілдерімен кездесуі өтті.

  Кездесуге SSTEC директорының орынбасары Чжоу Юаньюань, бөлім бастығының орынбасары Сунь Шуцзюань, SSTEC жобалық менеджері Лю Цзепей, ШЫҰ Қытай технологиялар трансферті орталығының жобалық менеджері Ирина Абатурова, Ғылым қорының басқарма төрағасы Камиль Ақатов, басқарма төрағасының орынбасары Әлия Сембаева және басқарушы директор Манат Келдібеков қатысты.

  Бұған дейін ШЫҰ Қытай технологиялар трансферті орталығының шақыруымен Ғылым қоры Шанхайда төмен көміртекті энергетика мәселелерін талқылауға қатысқан болатын. Бірлескен жұмыс барысында тұрақты энергетикалық технологияларды ілгерілету стратегиясы мен шешімдер әзірленді. Негізгі бастамалардың бірі төмен көміртекті инновациялық технологиялар жөніндегі Жаһандық Альянсты құру болды, оған Ғылым қоры да қосылды. Бұл серіктестік біздің жобаларымыздың халықаралық нарықтарға шығуына, инновациялық технологияларды енгізуге және халықаралық инвестицияларды тартуға бірегей мүмкіндіктер ашады.

  Кездесу барысында Ғылым қоры жасыл энергетика саласындағы өз қоржынынан бірқатар жобаларды ұсынды, оның ішінде қоршаған ортаның ластануына мониторинг жүргізу үшін геоақпараттық жүйе, мұнай кәсіпшілігі жабдықтары үшін коррозияға қарсы фосфат материалдарын әзірлеу, гетероструктуралық күн элементтері негізінде күн модульдерін өндіру, табиғи газ негізінде биопротеин өндіру.

  Кездесу қорытындысы бойынша Шанхай орталығымен ынтымақтастық туралы Меморандумға қол қойылды, бұл халықаралық ынтымақтастық пен қазақстандық технологияларды жаһандық нарықтарға жылжыту үшін жаңа көкжиектер ашады.

Ақпарат көзі: Қазақстан Республикасы Ғылым және жоғары білім министрлігі