ҚР Су ресурстары және ирригация вице-министрі Ерболат Ибрайханов Түркістан облысы, Түлкібас ауданына жасаған жұмыс сапары барысында «Қазсушар» РМК Түркістан облысы бойынша филиалының директоры Қазыбек Бедебаев және аудан әкімі Нұржан Ізтілеуовпен бірге аудан аумағындағы құрылысы жүріп жатқан су нысандарын аралап, атқарылып жатқан жұмыстарды бақылады. Соңғы жылдары

ауданда өзектілігі артқан ағын су мәселесін түбегейлі шешу мақсатында салаға жауапты вице-министр тиісті мекеме басшысы мен мердігерге халықты ағын сумен қамту жұмыстарын сапалы әрі уақытылы аяқтауды тапсырды. Құрылыс жұмыстары барысында жергілікті халықтың ұсыныс-өтініштерінің орындалуын қадағалауды, суғару маусымы кезінде канал арналарына су жіберіп, халыққа ыңғайлы жағдай жасау керектігін атап өтті. Айта кетейік, бүгінгі таңда аудан аумағында 123 шақырымды құрайтын 13 су нысанының 77 шақырымын бетондау жұмыстары жүргізілуде. Қазіргі таңда жұмыстың 60 пайызға жуығы аяқталып, 44 шақырымы бетондалған. Тұрғындарға қолайлы жағдай жасау мақсатында егіндікті суғару маусымы биыл мамыр айының 20-сы мен тамыз айының аяғына дейін құрылыс жұмыстары уақытша тоқтатылып, каналдарға су жіберіледі. Сол аралықта жауапты мамандар мен мердігер мекеме каналдарды механикалық тазалаудан өткізу жұмыстарын атқарады. Аталған құрылыс жұмыстары толық аяқталғаннан соң 8600 га суғармалы жер қайта айналымға қосылады деп күтілуде. Түркістан облысы әкімінің баспасөз қызметі

Ақпарат көзі: ГУ "Аппарат акима Туркестанской области"