Талдықорғанда қаланың жаңа бас жоспарын әзірлеу және шаһарды одан әрі дамыту мақсатында қоғамдық талқылау өтті.

Осыған орай, бүгін қала әкімі Ернат Бәзілдің қатысуымен облыс орталығының бас жоспарын әзірлеу бойынша қоғамдық талқылау өткізіліп, маңызды кездесу барысында қаланы дамытудың ағымдағы және болашақ жобасы туралы айтылып, осы жобаны әзірлеуші авторларына жиналғандар тарапынан сауалдар қойылды. Қала жанашырлары шаһардың болашағына, әсіресе жол тораптары мен мәдени, әлеуметтік нысандарының орналасуына қызығушылықтарын танытып, ойларымен бөлісті.

«Біз Талдықорған қаласының бас жоспарының заман ағымына сай болуы үшін жүйелі түрде жұмыс істеп жатырмыз. Халықтың пікірін ескеру үшін осы қоғамдық тыңдауды өткізіп отырмыз. Бұл екінші қоғамдық тыңдалым. Халық белсене қатысып, өздеріне қолайлы болуы үшін қажеттіліктерін айтуда. Біз осы Бас жоспарды Талдықорған қаласы мен қалаға қарасты 2 ауылдық округті және шаһардың территориясындағы барлық саяжай қоғамдастықтарын еңгізе отырып әзірледік. Мәселен, қолданыстағы сыртқы көлік инфрақұрылымын (Өскемен-Алматы тас жолы) басты жоспарлау кіндігі (осьі) ретінде пайдалана отырып, авто және теміржолмен біріктірілген көлік торабын еңгізіп,көлік-логистикалық орталықты қарастырдық. Осы сыртқы көлік инфрақұрылымын пайдалана отырып, халыққа қызмет көрсететін шағын және орта бизнесті, туризмді, ауылшаруашылық құрылымдарын дамытуға т.б қаланың қауіпсіздігін жетілдіруге қатысты табиғи кедергілерді көпірлер, жол өтпелерін салу арқылы жаңғыртуға, кеңейтуге, қайта құрылымдауға баса назар аудардық», - дейді Ерұлан Көкен Талдықорған қаласының Бас жоспарының авторы, «АТС Град» ЖШС-нің бас сәулетшісі.

Ақпарат көзі: ГУ «Аппарат Акима города Талдыкоргана»