ҚР Ауыл шаруашылығы вице-министрі Ермек Кенжеханұлы Ташкентте өткен «Теңізге шығу мүмкіндігі жоқ дамушы елдердің азық-түлік қауіпсіздігі және тұрақты даму мақсаттары» атты халықаралық форумда Қазақстанды таныстырды.

Шараға БҰҰ-ның Азық-түлік және ауыл шаруашылығы ұйымының бас директоры Цуй Дунъюй, теңізге шығу мүмкіндігі жоқ 32 дамушы елдің, халықаралық ұйымдардың және шетелдік мемлекеттердің өкілдері қатысты.

Форумның басты мақсаты - теңізге шығу мүмкіндігі жоқ елдердегі ауыл шаруашылығы өнімдерінің саудасы, азық-түлік қауіпсіздігі және логистикамен байланысты мәселелерді шешу, азық-түлік қауіпсіздігі туралы хабардарлықты арттыру және негізгі аймақтық және әлемдік мәселелерді шешу.

Форумда сөз сөйлеген Ермек Кенжеханұлы Қазақстанда 20 миллиард долларлық ауыл шаруашылығы өнімдері мен 6 миллиард долларлық өңдеу өнімдері өндірілетінін атап өтті. Азық-түлік қауіпсіздігі барлық негізгі азық-түлік түрлері бойынша қамтамасыз етілген. Ауыл шаруашылығы саласындағы еңбек өнімділігінің орташа жылдық өсу қарқыны 20% құрайды.

«Соңғы 5 жылда ауыл шаруашылығы өнімдерін экспорттау көлемі екі есеге өсіп, 5,4 миллиард долларға жетті. Келесі 5 жылда оны 10 миллиард долларға жеткізу мақсаты қойылған. Бұл жетістіктер ауыл шаруашылығы технологияларын енгізу, суаруды дамыту және цифрландырумен байланысты. Заманауи сүт фермалары мен ет агрокешендері құрылып жатыр. Бұл - саланы жыл сайын қолдауды арттыруды қоса алғанда, мемлекеттің ұзақ мерзімді ауыл шаруашылығы саясатының нәтижесі.

5 жылда ауыл шаруашылығына инвестиция екі есеге дерлік өсіп, 2023 жылы 2,2 миллиард долларға жетті. Бұл сектордың инвесторлар үшін тартымдылығы артып келе жатқанын көрсетеді. Глобализация және азық-түлік сұранысының өсуі жағдайында Қазақстанның азық-түлік саласы халықаралық нарықтағы маңызды ойыншы болуы мүмкін», - деді вице-министр, сонымен қатар Қазақстанның Орталық Азияда 2030 жылға дейін азық-түлік қауіпсіздігін қамтамасыз ету бойынша Стратегиялық жоспарды әзірлеуді бастағанын және «жасыл экономика» принциптерін енгізу үстінде екенін қоса кетті.

Форум аясында тақырыптық сессиялар өтіп, өзара тиімді келісімдерге қол қойылды.

Ақпарат көзі: Министерство сельского хозяйства Республики Казахстан