2024 жылғы 16-17 қыркүйекте Тәжікстан Республикасының Душанбе қаласында тәжік тарапының төрағалығымен Экономикалық ынтымақтастық ұйымы (ЭЫҰ) министрлерінің дүлей зілзалалар қауіп-қатерлерін азайту жөніндегі 9-шы кеңесі, сондай-ақ дүлей зілзалалар қауіп-қатерлерін азайту жөніндегі жұмыс тобының жоғары деңгейдегі кеңесі өтті.      

Іс-шараға Әзірбайжан, Қырғыз, Қазақстан, Түрік, Түрікменстан, Тәжікстан Республикалары, Иран Ислам Республикасы, Пәкістан төтенше ведомстволарының өкілдері, сондай-ақ ЭЫҰ өкілдері қатысты.

Қазақстандық делегацияны Төтенше жағдайлар вице-министрі Батырбек Әбдішев, Төтенше жағдайлардың алдын алу комитеті төрағасының міндетін атқарушы – Қазақстан Республикасындағы зілзалалар қауіп-қатерін азайту жөніндегі Сендай негіздемелік бағдарламасының ұлттық үйлестірушісі Серік Жүнісбеков басқарды.

Батырбек Әбдішев өз сөзінде ҚР ТЖМ табиғи және техногендік сипаттағы төтенше жағдайлардың алдын алу саласындағы басшылықты жүзеге асыратын, төтенше жағдайлардың алдын алудың заманауи әдістерін белсенді енгізетін уәкілетті орган болып табылатынын атап өтті. Қазіргі уақытта барлық инновациялық технологиялар қолданылатын табиғи құбылыстарды бақылау жүйелерін құруға басты назар аударылады.

Кеңес барысында делегация басшылары ЭЫҰ өңіріндегі табиғи және техногендік сипаттағы төтенше жағдайлардың алдын алу және оларды жою саласындағы қызметтің өзекті мәселелері туралы баяндамалар жасады, жол картасы мен ЭЫҰ-ның 2021-2025 жылдарға арналған зілзалалар қауіп-қатерін азайту жөніндегі өңірлік негіздемелік бағдарламасының іске асырылу барысы туралы шолуды тыңдады және Душанбе декларациясына қол қойды.

ЭЫҰ өңірі әлемдегі табиғи апаттарға бейім аймақтардың бірі болып табылады. Геологиялық құрылымына, топографиясына және климаттық сипаттамаларына байланысты өңір көптеген төтенше жағдайларға ұшырайды. Осыған байланысты, табиғи зілзалалар қауіп-қатерін азайту мәселелері бойынша өңірлік ынтымақтастық ЭЫҰ-ның 2025 жылға арналған басым бағыттарының бірі ретінде айқындалды.

Аталған кеңестер төтенше жағдайлардың алдын алу және оларды жою саласында үйлестірілген саясат жүргізу, ЭЫҰ елдерінің құтқару ведомстволарының өңірлік өзара іс-қимылын дамыту және өңірдегі зілзалалар қаіп-қатерін азайту жөніндегі Сендай негіздемелік бағдарламасын іске асыруды жеделдету үшін басымдықтарды айқындау жөніндегі шешімдерді әзірлеу үшін тиімді алаң болды.

ҚР ТЖМ баспасөз қызметі

Ақпарат көзі: Министерство по чрезвычайным ситуациям Республики Казахстан