Мемлекеттік азаматтық қорғаныс жүйесін әскери уақыттағы азаматтық қорғаныс іс-шараларын орындауға дайындау, сондай-ақ әскери жағдай кезінде халықты және ел аумағын қорғауды ұйымдастыру бойынша басқарушылық шешімдерді пысықтау мақсатында 2024 жылғы 26 қыркүйекте «Бекет - 2024» ведомствоаралық кешенді оқу-жаттығу аясында Жамбыл облысы ТЖ департаменті бірқатар іс-шараларды өткізеді. Оқу-жаттығуға орталық мемлекеттік органдардың (республикалық азаматтық қорғау қызметтері), жергілікті атқарушы органдардың, облыстық, аудандық және қалалық азаматтық қорғау қызметтерінің жедел топтары, Төтенше жағдайлар, Ішкі істер министрліктерінің бөлімшелері, Ұлттық ұлан гвардия мен Қорғаныс министрлігінің әскери бөлімдері қатысады.      Төтенше жағдайларды жою бойынша шекара маңындағы іс-шараларды пысықтау аясында шекаралас облыстарда азаматтық қорғау органдарының бөлімшелерімен жедел ақпарат алмасу бойынша кезекші қызметтердің өзара әрекеттестігі пысықталады.      Жоспарға сәйкес, зардап шеккен халыққа арналған лагерь, сондай-ақ қауіпсіз аймаққа эвакуацияланатын халықты жинау және көшіру үшін жинау-эвакуациялық пункті орналастырылады. Ерекше қауіпті инфекциялар бойынша тактикалық-арнайы оқу-жаттығу өткізілді.      Оқу-жаттығу барысында азаматтық қорғау күштері мен құралдарының дайындық деңгейі бойынша «Бірінші топтың алғашқы іс-шаралары», «Екінші топтың алғашқы іс-шаралары» және «Жалпы» дәрежелері бойынша теориялық және практикалық іс-қимылдар пысықталады.     Қабылданған алдын алу шаралары төтенше жағдайлардың салдарын азайтуға және халық арасындағы шығындарды төмендетуге, сондай-ақ мемлекеттің экономикасының тұрақтылығын арттыруға мүмкіндік береді.     Жамбыл облысы ТЖД баспасөз қызметі

Ақпарат көзі: Министерство по чрезвычайным ситуациям Республики Казахстан