«Балдәурен» республикалық оқу-сауықтыру орталығының филиалдарында әскери қызметшілердің балаларына бос уақытты сапалы әрі мазмұнды ұйымдастыру үшін бар мүмкіндік жасалған. Сонымен бірге қорғаныс ведомствосы оқу-сауықтыру орталығымен балалардың демалысын ғана емес, әскери-патриоттық тәрбиені жандандыруды көздейтін ынтымақтастыққа да қол жеткізіп отыр.

Қорғаныс министрі генерал-полковник Руслан Жақсылықовтың Оқу-ағарту министрі Ғани Бейсембаевпен жыл басында өткен кездесуі барысында өскелең ұрпақты әскери-патриоттық рухта тәрбиелеу, балалар мен оқушылардың бос уақытын мазмұнды ұйымдастыру туралы жан-жақты айтылған болатын. Кездесуде ведомство басшылары «Балдәурен» республикалық оқу-сауықтыру орталығының төрт филиалында әскери қызметшілер мен Қарулы күштер қызметкерлерінің балаларына демалуға, сондай-ақ ерекше білім беру қажеттілігі бар балаларды оңалту үшін квоталар бөлу мүмкіндігін талқылаған еді.

Көп ұзамай қос министрліктің бірлескен жобасы іске қосылып, биыл «Балдәурен» сауықтыру орталығында мыңнан астам бала қызықты демалысын өткізді. Қарулы күштер әскери қызметшілерінің балалары «Балдәурен» республикалық оқу-сауықтыру орталығының Түркістан, Бурабай, Балқаш қалаларындағы филиалдарына демалуға мүмкіндік алды. Ал ақтаулық оқушылар Қонаев қаласындағы филиалда демалды.

Демалысқа бірінші кезекте шалғайдағы гарнизондарда әскери қызмет өткеретін, толық емес және көп балалы әскери қызметшілер мен азаматтық персоналдың балалары жіберілді. Бір ауысым 21 күнді құрайды. Балалар мәдени-демалыс, сауықтыру іс-шараларынан бөлек балалар мектеп бағдарламасы бойынша мемлекеттік және орыс тілінде оқудан өтті.

Айта кету керек, «Балдәурен» оқу-сауықтыру орталығымен ынтымақтастық әскерге шақырылғанға дейінгі жастармен жұмыс істеуге бағытталған. Тиісті оқу бағдарламасы әскери істің негіздерін зерделеуге арналған практикалық сабақтарды қамтиды. Балалар әскери бөлімдерде болып, оларға сабақ өткізілді. Оқушылар саперлер мен десанттар қызметінің ерекшелігімен, сондай-ақ қару-жарақ және әскери техника үлгілерімен танысты.

Таңертеңнен бастап «Балдәурен» орталығында мектеп бағдарламасының сәйкес сабақтар өткізілді. Бұл үшін филиалдар барлық қажетті оқу әдебиеттерімен қамтамасыз етілген. Түстен кейін сауықтыру, спорттық және мәдени-бұқаралық іс-шаралар ұйымдастырылды.

Ең белсенді демалыс, әрине, жаз айларына тиесілі. Содан болар әлеуметтік желі балалардың жақсы пікірлеріне толы. Олардың ата-аналарының да осындай мүмкіндік туғызған өз қолбасшылығына алғысы шексіз. Әскери қызметшілер Қорғаныс министрлігінің басшылығына, әскери бөлімдердің қолбасшылығына, отбасыларымен жұмыс қызметінің басшыларына «Балдәурен» орталығында ұмытылмас демалыс ұйымдастырғаны үшін ризашылықтарын білдірді.

Анасы Құрлық әскерлерінде қызмет ететін 12 жасар Данил Хамитов әсерінен арыла алмай жүр. Оның айтуынша, лагерьде балаларға барлық жағдай жасалған. Таза бөлмелер мен дәмді тағамдар, қызықты демалыс, түрлі үйірмелердегі сабақтар естен кетпейді.

«Біз бассейнде жүздік, онда нұсқаушылар бізге суға жүзуді үйретті. Көлде катамаранмен жүрдік», - дейді Даниал. 

Балалардың бос уақытын өткізуді әр балаға өз ермегін табуға мүмкіндік беретін жан-жақты іс-шаралары бар күнделікті бай бағдарлама қамтамасыз етті.

Ақпарат көзі: Министерство обороны Республики Казахстан