Талдықорғанда «Жетісу» кәсіби волейбол клубына арналған жаттығу базасы салынып бітуге таяу. Оның жанынан демеушілік қаражат есебінен клуб спортшыларына арналған тұрғын үй салынуда. Сонымен қатар демеушілер қалада халықаралық талаптар мен стандарттарға сай келетін тағы бір спорт нысаны – үстел теннисі орталығын салып жатыр. Құрылыс жұмыстарының барысымен облыс әкімі Бейбіт Исабаев танысып шықты, - деп хабарлайды Жетісу облысы әкімінің баспасөз қызметі.

Алдымен Бейбіт Исабаев жаттығу базасына барды, онда жақын күндерде «Жетісу» КВК ерлер мен әйелдер командаларының негізгі құрамы, сондай-ақ жастар құрамы жаттығатын болады. Айта кетсек, Қазақстанда бұл спорттық жаттығу базасының баламасы жоқ. Онда әйелдер мен ерлер құрамының жаттығуына арналған екі бөлек зал бар. Сондай-ақ, спорт залы және қажетті әкімшілік және санитарлық-тұрмыстық үй-жайлар, медициналық, массаж бөлмелері бар. Облыс әкімі мердігер ұйымның өкілдерімен, «Жетісу» КВК директорымен бірге объектіні жайластыру, спорттық жабдықтарды орналастыру, іргелес аумақты абаттандыру мәселелерін талқылап, сондай-ақ клубты дамыту жоспарлары туралы айта келе, спортты коммерцияландыру, тиісінше клуб жүйесіне кезең-кезеңімен көшу жүргізіліп жатқанын атап өтті. «Қабылданған шаралар мен демеушілік қолдаудың арқасында біздің «Жетісу» кәсіби волейбол клубында жаттығу өткізуге арналған жеке спорттық база мен клубтың волейболшыларына арналған тұрғын үй салынуда. Келесі жылы волейболға бейімделген мектеп ашуды жоспарлап отырмыз. Жалпы білім беретін мектептерден волейболға таланты бар балалар іріктеледі. Бұл мектепте олар волейболмен белсенді айналысады. Осылайша, өз ойыншыларымызды үйретіп, өз чемпиондарымызды тәрбиелеп шығарамыз», - деді Б.Исабаев. Атап өтсек, жаттығу базасының ғимаратын салу мен безендіру бағытындағы құрылыс-монтаждау жұмыстарының басым бөлігі іс жүзінде аяқталды, енді жаттығу залдарын жайластыруға ерекше назар аударылатын болады. Бұл залдарда ең маңыздысы жоғары сапалы спорттық еден жабыны төселеді, сондай-ақ іргелес аумақ абаттандырылады. «Жетісу» КВК директоры Нияз Жантілеуовтың айтуынша, спортшыларға арналған шағын отбасылық тұрғын үй 40-45 орынға есептелген. Жертөлесі бар төрт қабатты ғимараттың 2 кіреберіс болады. Олардың бірінде 12 бір бөлмелі және 3 екі бөлмелі, ал екіншісінде жеке ванна бөлмелері бар 26 бөлме бар. Сондай-ақ қажетті санитарлық-тұрмыстық үй-жайлар қарастырылған. Облыс әкімі осындай мүмкіндіктерден кейін клуб өзінің ойын деңгейін көтеруі керектігіне ерекше екпін түсірді.

Мұнан соң Бейбіт Исабаев толықтай демеушілік қаражат есебінен салынып жатқан, халықаралық талаптар мен стандарттарға сай келетін үстел теннисі орталығына барды. Нысанда темірбетон жұмыстары аяқталуға жақын. Әзірге құрылысқа 25-ке жуық адам жұмылдырылған, алдағы уақытта жұмысшылар саны арттырылады. Жаттығулар мен жарыстар өтетін залдың жалпы ауданы 1600 шаршы метр, 150 орындық трибунасы бар. Орталыққа 16 теннис үстелі орнатылады, халықаралық жарыстар кезінде тек 9 үстел ғана қалдырылады. Облыстық дене шынықтыру және спорт басқармасының басшысы Ұлан Рысқұлдың айтуынша, ғимараттың екінші қабатының пайдалы алаңын неғұрлым тиімді пайдалану үшін шахмат клубын ашу көзделіп отыр. Облыс әкімі жаңа спорт нысанының аумағын абаттандыру мәселелеріне ерекше назар аударды. Көгалдандыру, тұрақ орындарын орналастырудың жоспарлары талқыланды. Бейбіт Өксікбайұлы өңірдегі жаңа спорт нысандары резервтік бюджет пен демеушілік қаражаттың арқасында бой көтергенін атап өтті. «Мұндай нысандарды салуға біз әлеуметтік нысандарды немесе тұрғын үйлерді салуға көзделген бюджет қаражатын пайдаланбаймыз, демеушілерді тартамыз. Мәдениет пен спорт салаларын дамыту жайы үнемі назарымызда болуы керек. Бұл азаматтардың рухани және физикалық денсаулығын нығайтуға әсер ететін әлеуметтік саясаттың маңызды бөлігі», - деді ол.

Атап өтсек, демеушілер өңірдегі әлеуметтік осал топ санатындағы тұрғындарға үй салу мәселелеріне де көмек көрсетуде. Мәселен, «Самұрық-Қазына» АҚ қаражаты есебінен Талдықорғанда әрқайсысы 60 пәтерлік бес қабатты 7 үй салынуда. Әрқайсысының салыну сатысы қазірше әр деңгейде. «ҚазақСтройЭксклюзив» компаниялар тобының бас инженері Исмихан Каримовтың айтуынша, әр үйде 30 үш бөлмелі, 15 бір және екі бөлмелі пәтер бар. Бес көпқабатты үйдің құрылысы тамыз айында аяқталады, ал қалған екеуі жылыту маусымы басталғанға дейін бітуі тиіс. Мердігер ұйыммен және қалалық әкімдік өкілдерімен бірге үйлердің қасбеттерінің түс үйлесімі мен қаптайтын материалдарын таңдау, аулаларды абаттандыру мәселелерін талқылаған облыс әкімі Бейбіт Исабаев құрылыс-монтаждау жұмыстарын мерзімінде, сапалы жүргізу бірінші кезектегі міндет екенін айтты.

Жетісу облысы әкімінің баспасөз қызметі

Фотограф: Жеңіс Ысқабай

Ақпарат көзі: ГУ «Аппарат Акима города Талдыкоргана»