Жетісу өңірінде «Жетісу – кітапқұмарлар өлкесі» байқауы биыл 8-ші жыл қатарынан өткізіліп отыр. Облыстық қоғамдық даму басқармасының ұйымдастыруымен өткізілген биылғы байқаудың жеңімпаздары бүгін Талдықорғандағы Тіл сарайында марапатталды. Сол сияқты осы күні «Мемлекеттік тіл және БАҚ» облыстық байқауының да қорытындысы шығарылды, - деп хабарлайды Жетісу облысы әкімінің баспасөз қызметі.

Облыстық қоғамдық даму басқармасы басшысының орынбасары Айдос Есжановтың айтуынша, ересектер мен студенттер арасында екі тілде өткізілген кітапқұмарлар байқауына 18 бен 62 жас аралығындағы 74 адам қатысқан. Ережеге сәйкес қазақ тілінде қатысушы студенттерге Қуаныш Шоңбайдың «Бізге айтылмаған құпия», ересектерге Мұхтар Мағауиннің «Тазының өлімі», орыс тілінде қатысушы студенттерге танымал жазушы Бёрнетт Фрэнсистің «Таинственный сад», ересектерге америкалық автор Наполеон Хиллдің «Думай и богатей» кітабын оқу ұсынылған. Оқырмандардың шығарманы меңгеру деңгейі Телеграм каналындағы арнайы тест арқылы сарапқа салынды. Тест нәтижесі бойынша кітап оқушылардың ішінен 16 адам жеңімпаз атанып, оларға арнайы диплом мен 50-100 мың теңге көлемінде ақшалай сыйлықтар берілді. Жеңімпаздар арасында Ескелді, Кербұлақ аудандары мен Талдықорған қаласының тұрғындары бар.

- Кітап оқығанды бала кезімнен жақсы көремін. Сосын осы байқау туралы естіп, оған қатысып көруге бел байладым. Мұхтар Мағауиннің «Тазының өлімі» шығармасы бойынша тест тапсырдық. Ондағы 100 сұраққа 60 минут уақыт берілді. Мен сұрақтарды 28 минут 30 секундта аяқтап, уақыт жағынан да, сұрақтарға дұрыс жауап беру жағынан да үздік шықтым. Қоғамға, жас ұрпаққа кітап оқыту – сананы өзгертудің, өзіңді-өзің тәрбиелеудің ең жақсы жолы. Сондықтан мұндай іс-шаралар бізге аса қажет, - дейді байқаудың 1-ші орын иегері Айдар Мусралинов. 

Осы күні «Мемлекеттік тіл және БАҚ» облыстық байқауының да жеңімпаздары марапатталды. Ұйымдастырушылар дәстүрлі байқау биыл «Үздік мақала», «Үздік теле және радиобағдарлама» сынды екі бағытта өткенін айтады. Байқауға мемлекеттік тіл саясатын жемісті жүргізудегі мәселелер мен олардың шешімдері жайлы талдау жасап, өз ой-пікірлерін жеткізген 60-қа жуық мақала мен теле-радио хабар түскен. Соның ішінде «Жетісу» телеарнасының продюсері Гүлжан Қызайбайдың хабары үздік шығып, Бас жүлдеге лайық деп табылды. Сол сияқты «Жетісу» газетінің тілшісі Еңлік Кенебай, «Алакөл» газетінің бас редакторы А лмат Есенбеков жүлделі 1-ші орынды иеленді. Сонымен қатар «Егемен Қазақстан», «Жетісу», «Алатау», «Кербұлақ жұлдызы» газеттерінің, «Жетісу» радиосы мен «Жетісу» телеарнасының қызметкерлеріне 2, 3 орындар мен ынталандыру сыйлықтары берілді. Жеңімпаздар арнайы дипломмен және 80-200 мың теңге көлеміндегі ақшалай сыйлықтарға ие болды. 

Жетісу облысы әкімінің баспасөз қызметі.  

Фотосуреттерді түсірген: Руслан Кадыров.

Ақпарат көзі: ГУ «Аппарат Акима города Талдыкоргана»