Бүгін Талдықорғанда облыс әкімінің бірінші орынбасары Әлібек Жақанбаев кәсіби мерекелеріне орай өңірдегі мемлекеттік қызметшілерді құттықтап, бірқатар марапаттар тапсырды, - деп хабарлайды Жетісу облысы әкімінің баспасөз қызметі.

Салтанатты шарада Қазақстан Республикасы Мемлекеттік қызмет істері агенттігі Жетісу облысы бойынша департаментінің басшысы, Әдеп жөніндегі кеңес төрағасы Қобылан Манапов әріптестеріне ізгі тілегін білдірді. Мұнан соң облыс әкімінің атынан құттықтау сөз сөйлеген облыс әкімінің бірінші орынбасары Әлібек Жақанбаев:

- Мемлекеттік қызметші – мемлекеттің айнасы. Халықтың мемлекетке деген сенімі ең алдымен біздің әрқайсымыздың біліктілігіміз бен рухани-адамгершілік қасиетімізге байланысты қалыптасады. Қарапайымдылық қағидатымен өмір сүретін адал қызметші, кәсіби білікті маман, жан-жақты жетілген, патриот азамат мемлекетті алға жылжытады. Сондықтан әрбір қызметші өзінің кәсіби-тұлғалық болмысын үнемі дамытып отыруы керек. Құрметті әріптестер, атқарып жатқан еңбектеріңіз жемісті болсын! Халықпен бірге, қоян-қолтық жұмыс істеп, облыстың әлеуметтік-экономикалық дамуына үлес қоса беріңіздер. Отбасыларыңыз аман, дендеріңіз сау болсын! – деді.

Жиын бұдан әрі марапаттау рәсімімен жалғасты. Осы салада 15 жылдан астам мінсіз қызмет етіп келе жатқан облыс әкімі аппаратының әдеп жөніндегі уәкілі Ғабит Тұрсынбайға, Текелі қалалық ішкі саясат, мәдениет тілдерді дамыту және спорт бөлімінің басшысы Нұржамал Шохановаға және облыстық жұмыспен қамтуды үйлестіру, және әлеуметтік бағдарламалар басқармасының бас маманы Гүлшат Мусиноваға «Үздік мемлекеттік қызметші» төсбелгісі тапсырылды. Сол сияқты бірқатар қызметшілерге облыс әкімінің Құрмет грамотасы мен Алғыс хаты берілді.

Сонымен бірге биыл тұңғыш рет мемлекеттік қызметшілер қатарына кірген жас мамандар Әйгерім Дуанаева, Наталья Усембаева, Бауыржан Шағжанов салтанатты түрде ант берді.

Жетісу облысы әкімінің баспасөз қызметі.

Фотограф: Дмитрий Ерофеев

Ақпарат көзі: Жетісу облысының әкімдігі