Жеңіс күніне орай қалыптасқан дәстүр бойынша облыс әкімі Бейбіт Исабаев таңертең Талдықорғанда тұратын Ұлы Отан соғысының ардагерлерін құттықтап, ел Президентінің атынан құттықтау жеделхаттарын табыстау үшін олардың шаңырақтарына барды. Қорғаныс министрі Руслан Жақсылықов, тұңғыш қазақ ғарышкері, Кеңес Одағының Батыры, Халық қаһарманы Тоқтар Әубәкіров және ғарышкер жерлесіміз Айдын Айымбетов өңірге Жеңістің 79 жылдығына арналған мерекелік іс-шараларға қатысу үшін арнайы келіп, аға буын майдангерлерге жылы лебіздері мен алғыстарын білдірді, - деп хабарлайды Жетісу облысы әкімінің баспасөз қызметі.

Облыс басшысы ресми қонақтармен бірге соғыс ардагері Ысқақ Құсайыновқа бірінші болып келді, биыл ардагер 100 жасқа толды. Ол 1942 жылы өз еркімен майданға аттанған. Ардагер өзінің әскери борышын Амур Әскери-теңіз флотында атқарып, «Әскери-теңіз флотының үздігі» атағын иеленді. Оның жауынгерлік наградалары мен еңбегіне берілген марапаттарының қатарында ІІ дәрежелі Отан соғысы ордені, Еңбек Қызыл Ту ордені, «Еңбек ері» медалі бар. Соғыстан кейінгі жылдары Ысқақ Әбілпейісұлы өмірінің көп бөлігін өскелең ұрпақты тәрбиелеуге арнады, сөйтіп «Халық ағарту ісінің үздік қызметкері» атағына ие болды.

Сол сияқты майдангер Сәрсенбай Қаңтарбай да естеліктерін еске алды. Ол 1942 жылы 18 жасында майданға шақырылған. Аты аңызға айналған Бауыржан Момышұлымен бір дивизияда болып, көрсеткен ерлігі, батылдығы мен қайсарлығы үшін І және ІІ дәрежелі Ұлы Отан соғысы ордендерімен марапатталды.

- Осы мереке күндері жолдастарымды, қаруластарымды еске аламын. Тәуелсіз Қазақстанның бірінші Қорғаныс министрі Сағадат Нұрмағамбетовпен құрдаспыз, оқудан, әскери даярлықтан бірге өттік, бір жылдай бір-бірімізге жақын жерде болдық. Бауыржан Момышұлының басшылығымен ұрысқа кірдім. Басымыздан көп нәрсе өтті. Ертең 100 жасқа толамын, бұл да менің өмір тарихымның бір бөлшегі ғой. 20 немерем үйленді, тағы 5 немерем үйленетін жаста, сондықтан мен әлі де еңсемді тік ұстауға тиіспін, - деген ардагер бата беріп, құрмет пен қамқорлық көрсеткені үшін баршаға алғыс білдірді.

Майданға 18 жасында аттанған ардагер Төлеубай Чектыбаев та өзінің жауынгерлік жолы туралы айтып берді. 1943-1944 жылдары жас сарбаз Амур маңындағы Қиыр Шығыс шекарасын қорғап, 83-ші атқыштар дивизиясының құрамында Харбин қаласын азат етуге қатысқан. Жауынгерлік еңбегі үшін І дәрежелі Отан соғысы орденімен, «Ерлігі үшін» медалімен марапатталған. Қазір ардагер 99 жаста, төрт бала тәрбиелеп, немерелері мен шөберелерінің қызығын көріп отыр.

Ардагерлерге Мемлекет басшысының атынан құттықтау жеделхаттары, қызыл раушан гүл шоқтары, жеміс себеттері мен естелік сыйлықтар табыс етілді. Әскери оркестрдің музыкалық сүйемелдеуі құттықтау кездесулеріне ерекше мерекелік реңк берді. Ардагерлерді оқушылар мен студенттер де құттықтауға келді. Майдангерлер Сәрсенбай Каңтарбай мен Төлеубай Чектыбаев Орталық қалалық саябақтағы Даңқ обелискіне гүл шоқтарын қою рәсіміне қатысты.

Естеріңізге сала кетейік, Жетісу облысында Жеңістің 79 жылдығына орай Ұлы Отан соғысының ардагерлеріне 1,5 миллион теңгеден берілді. Бүгінгі таңда өңірде көзі тірі 4 соғыс ардагері бар. Жалпы 2024 жылы мерекеге біржолғы материалдық көмек төлеуге жергілікті бюджеттен 2808 адамға 207 190 000 теңге қарастырылған.

Жетісу облысы әкімінің баспасөз қызметі.

Фотограф: Жеңіс Ысқабай

Ақпарат көзі: Жетісу облысының әкімдігі