Жетісу облысында 9 Мамыр – Жеңіс күніне арналған мерекелік шаралар кең көлемде аталып өтілді. Алдымен Талдықорғандағы соғыс ардагерлерін облыс әкімі Бейбіт Исабаевпен бірге ҚР Қорғаныс министрі Руслан Жақсылықов, қазақтан шыққан тұңғыш ғарышкер, Кеңес Одағының Батыры, Халық қаһарманы Тоқтар Әубәкіров, ұшқыш жерлесіміз, Халық қаһарманы Айдын Айымбетов арнайы құттықтап барып, мұнан соң орталық мәдениет және демалыс саябағындағы Даңқ Обелискісіне гүлшоқтарын қою рәсіміне қатысты, - деп хабарлайды Жетісу облысы әкімінің баспасөз қызметі.

Бұдан әрі салтанатты шара орталық алаңда жалғасып, құттықтау сөз сөйлеген облыс әкімі Бейбіт Исабаев Жеңіс күнінің мән-маңызыға тоқталды, бұл мерекенің ұрпақ тәрбиесіндегі рөлін атап өтті. Сол сияқты биылғы Жеңіс мерекесі еліміздің алғашқы Қорғаныс министрі, Кеңес Одағының Батыры Сағадат Нұрмағамбетовтің, Берлиндегі Рейхстагқа Жеңіс туын тіккен Халық Қаһарманы Рақымжан Қошқарбаевтың 100 жылдықтарымен тұспа-тұс келгенін де тілге тиек етті.

- Жеңіс күні бейбітшіліктің мәңгі жасампаздығын, тыныштықтың баға жетпес қадірін ұғындыратын айтулы мереке. Бұл – ата-бабаларымыздың қажыры мен қайсарлығын, ерлігі мен елжандылығын ұлықтайтын қастерлі күн. Осы күні біз ұрпаққа ашық аспан, алаңсыз өмір сыйлаған ержүрек майдангерлерді еске алып, соғыс ардагерлері мен тыл еңбеккерлеріне құрмет көрсетіп, ерліктеріне тағзым етеміз. Бүгін Талдықорған қаласындағы әскери-әуе күштерінің № 21751 әскери бөліміне Кеңес Одағының екі мәрте батыры, әскери ұшқыш Сергей Данилович Луганскийдің есімі беріліп, бюсті орнатылуда. Президенттің бастамасымен қолға алынған бұл шара ерліктің ескірмейтінін, ер есімі ел жадында мәңгі сақталатынын айғақтап отыр, - деп атап өткен Б. Исабав өзінің мерекелік сөзінде ардагерлерге денсаулық, елімізге амандық, Отанымызға өсіп-өркендеу тіледі.

Орталық саябақта Абай көшесінен бастап Талдықорған әскери гарнизонының және төтенше жағдайлар департаментінің техника жабдықтарының көрмесі қойылды. Оқушылар сарайының тәрбиеленушілері «Бейбітшілік әлемі» атты көркем сурет көрмесін ұсынды.

«Ұрпақтар ұмытпайтын Ұлы Жеңіс!» атты театрландырылған көрініс көрсетіліп, бұдан соң көпшілікке Д.Рақышев атындағы Жетісу облыстық филармония әртістері, «Талдықорған әуендері» ФЭА-нің әншілері мен Талдықорған әскери горнизонының өнерпаздары мерекелік концерт ұсынды.

Осы күні облыс әкімі мен мереке қонақтары соғыс ардагерлеріне  арналған дала асханасындағы түскі астан дәм татып, ардагерлермен тілдесті.

Бұдан әрі Жеңіс күніне арналған іс-шаралар Талдықорған авиабазасының аумағында жалғасты. Салтанатты шара аясында № 21751 авиациялық әскери бөліміне Мемлекет басшысының бастамасымен Кеңес Одағының екі мәрте Батыры, әскери ұшқыш Сергей Данилович Луганскийдің есімі беріліп, бюсті орнатылды. Ал кешке «Жастар» саябағында «Ұлы ерлік-шаттығы» атты кешкілік диско бағдарлама ұйымдастырылады.

Жетісу облысы әкімінің баспасөз қызметі 

Фотограф: Руслан Кадыров, Жеңіс Ысқабай

Ақпарат көзі: Жетісу облысының әкімдігі