Жыл соңына дейін Көкшетауда жаңа әлеуметтік нысандар пайдалануға беріледі
Жыл соңына дейін Көкшетауда жаңа әлеуметтік нысандар пайдалануға беріледі
Көкшетауда қала тұрғындарының өмір сүру сапасын жақсартуға бағытталған ауқымды әлеуметтік жобалар жүзеге асырылуда. Ақмола облысының әкімі Марат Ахметжанов жұмыс сапары барысында құрылыс алаңдарын аралап, жобалардың іске асу барысымен танысты.
Жаңа көпфункционалды спорт кешені 1000 орынға шақталған. Бұл екі қабатты, функционалды жертөлесі бар заманауи нысан болмақ. Қазіргі уақытта сыртқы инженерлік желілерді жүргізу жұмыстары аяқталып, металл конструкцияларды орнату және жертөле қабатының қабырғаларын қалауға кірісілген. Нысанды биылғы жылдың желтоқсан айында пайдалануға беру жоспарланып отыр.
«Бұл кешен еліміз үшін бірегей жоба болмақ. Оның маңыздылығын Мемлекет басшысы да Бурабайда өткен Құрылтай барысында атап өтті. Нысан қаладағы спорттық және мәдени мүмкіндіктерді кеңейтіп қана қоймай, жастардың дамуына үлкен серпін береді. Біз оның ашылуы облыс тұрғындарының салауатты өмір салтын ұстануына оң серпін береді деп сенеміз», – деді Марат Ахметжанов.
Өңір үшін стратегиялық маңызы зор тағы бір нысан – 630 төсек-орынға шақталған көпбейінді облыстық аурухана. Бұл жаңа медициналық орталық облыс және жақын маңдағы аймақ тұрғындары үшін медициналық қызметтердің қолжетімділігі мен сапасын айтарлықтай жақсартуға мүмкіндік береді.
Қазіргі уақытта нысанда жер жұмыстары мен қада қағу жұмыстары аяқталды, іргетасы мен ғимарат қаңқасы орнатылуда, сондай-ақ топырақты тұрақтандыру шаралары да іске асырылды. Құрылыс жұмыстарының негізгі бөлігі 2025 жылдың соңына дейін аяқталып, ғимараттың жылыту контуры қалыптастырылады. Бұл қыста әрлеу жұмыстарын жалғастыруға мүмкіндік береді.
«Қазіргі таңда құрылыс алаңында 600-ге жуық маман – инженерлер, құрылысшылар, техникалық қызметкерлер жұмыс істеп жатыр. Жұмыс бекітілген кестеге сай жүргізілуде. Құрылысты толық аяқтауды 2027 жылдың бірінші тоқсанына жоспарлап отырмыз», – деді жоба бас инженері Игорь Растихин.
Сонымен қатар, өңір басшысы 500 орындық жалпы білім беретін мектептің құрылысымен танысты. Қазіргі таңда мұнда іргетас пен сыртқы инженерлік желілерді жүргізу жұмыстары аяқталуға жақын, бірінші және жертөле қабаттарының негізін құю жұмыстары жүріп жатыр. Жобаны жүзеге асырып жатқан мердігер ұйымның басшысы Талғат Хамитовтың айтуынша, инженерлік желілер бойынша барлық жұмыс толық орындалған. Мектеп 1 қыркүйекте оқушыларды қабылдауға дайын болады.
Сапар қорытындысы бойынша облыс әкімі барлық нысандардың белгіленген мерзімде аяқталуы тиіс екенін атап өтті.
«Көпфункционалды кешен, аурухана және мектеп – қала тұрғындары үшін аса қажетті инфрақұрылымдық нысандар. Біз құрылыс сапасы мен мерзімін қатаң бақылауда ұстаймыз», – деді Марат Ахметжанов.
Сонымен қатар, тұрғындардың өтініші бойынша өңір басшысы жаңа мектепке апаратын жолдың құрылыс жұмыстарымен танысты. Қазіргі уақытта мердігер ұйым жолдың барлық бөлігінде ірі түйіршікті асфальтбетонның төменгі қабатын төсеп, жаңбыр суына арналған арықтарды орнатқан. «АБК-Автодор» ЖШС учаске басшысы Николай Метрофановтың айтуынша, жол құрылысын екі апта ішінде аяқтау жоспарланып отыр.
Ақпарат көзі:
Біздің Telegram арнамызға жазылыңыз және барлық маңызды оқиғалардан хабардар болыңыз, мына сілтеме -
