Бүгін ҚР Үкіметінің отырысында еліміздегі автожол саласын дамыту мәселесі қаралды. 2023 жылдың қорытындысы бойынша Абай облысында нормативтік жағдайдағы жолдардың үлесі 78,6% -ды құрады. Бұл туралы Абай облысының әкімі Нұрлан Ұранхаев баяндады.

«2023-2025 жылдарға арналған республикалық және облыстық бюджеттер арасындағы жалпы сипаттағы трансферттердің көлемі туралы» ҚР Заңына сәйкес, 2024 жылға облыс үшін бюджет қаражатының ең төменгі көлемі бекітілді. Бұл қаражат облыстық және аудандық маңызы бар жолдарды күрделі және орташа жөндеуге бағытталған. Тағы 24 жобаны іске асыру жоспарлануда.

2024 жылы жергілікті маңызы бар 219 шақырым жөндеу жұмыстарын жүргізу жоспарлануда, оның 75 шақырымы облыстық маңызы бар жолдарға, ал 144 шақырымы аудандық маңызы бар жолдарға жатады. Облыста жыл сайын жол жөндеу жұмыстарымен қамту 220 шақырымнан асады.

2022 жылы жалпы сипаттағы трансферттер есебінен 3,2 млрд теңге сомасына 175 шақырым жол жөнделді. Оның ішінде 42 шақырымы облыстық (1,1 млрд теңгеге) және 133 шақырымы аудандық маңызы бар жолдар (2,1 млрд теңгеге). 2023 жылы 245 шақырым жол жөнделді, оның 107 шақырымы облыстық болса, 138 шақырымы аудандық жол.

Анықтама үшін: Абай облысындағы автомобиль жолдарының жалпы ұзындығы 4 656 шақырымды құрайды, оның 1 593 шақырымы облыстық, ал 3 063 шақырымы аудандық маңызы бар жолдар.

Ақпарат көзі: Абай облысының әкімдігі