Облыс әкімі Марат Ахметжанов Есіл ауданының аграрийлерімен кездесіп, егін жинау науқанының барысы мен мемлекеттік қолдау шараларының іске асырылуын талқылады.

Биыл облыста алғашқылардың бірі болып «Тней Агро» ЖШС «Кен дала 2» бағдарламасы бойынша қаржы алды.

«Біз егін жинау науқаны үшін барлық қажетті құралдар мен жабдықтарды уақытылы сатып ала алдық. Бұл қазір өз жемісін берді. Біздің егістіктегі орташа өнімділік гектарына 20 центнерден асады», - деді директор Дамир Балданов.

Облыс әкімі егін жинау науқаны белсенді өтіп жатқан «Шаңырақ Р» ЖШС алаңдарын аралады.

Кәсіпорын басшысы Уәли Рахметовтың айтуынша, астықтың 33 пайызы жиналды, орташа өнімділік 18 ц/га құрайды. Серіктестіктің алқабында бидайдың Августина және Айна сұрыптары өседі. Олардың өнімділігі гектарына 18 және 20 центнерді құрады. Орақ науқанына техника лизингіне жеңілдікпен кредит беру бағдарламасы бойынша сатып алынған 4 комбайн жұмылдырылған.

Айта кетейік, бүгінгі таңда өңірде 1155 мың га немесе 24.6% жиналды. Егіннің орташа өнімділігі 12,5 ц/га болған кезде, шамамен 1446,3 мың тонна астық бастырылды. Күзгі дала жұмыстарын үйлестіру үшін облыстық жедел штаб жұмысын бастады, осыған ұқсас штабтар әр өңірде құрылған.

Осы жылдың орақ науқанына 8,9 мың астық жинайтын комбайн, оның ішінде 4,8 мың заманауи өнімділігі жоғары комбайн, 2,6 мың орақ және 4,8 мың жүк автомобильдері тартылмақ.

Ақмола облысында егін жинау жұмыстарын жүргізуге 83 мың тонна дизель отынының кепілдендірілген көлемі бөлінді, оның ақырғы сату бағасы тоннасына 250 мың теңгені құрайды.

Ақпарат көзі: ГУ «Аппарат акима Акмолинской области»