Бүгін Қазақстанның жаһандық инвестициялар жөніндегі дөңгелек үстелі (KGIR-2024) аясында Ақмола облысының әкімдігі, «KAZAKH INVEST» ҰК» АҚ және Dalian Hesheng Holding Group Co., Ltd. компаниясы арасында ынтымақтастық туралы стратегиялық келісімге қол қойылды. Келісім аясында өңірдің агроөнеркәсіп кешенінде ауқымды инвестициялық жобаны жүзеге асыру – Аршалы ауданының «Aqmola» индустриалды аймағында астықты терең өңдеу зауытын салу қарастырылған.

Құны шамамен 650 млрд АҚШ долларын құрайтын бұл жоба 1000-нан астам жаңа жұмыс орнын ашады және Қазақстанның экспорттық әлеуетін кеңейтуге бағытталған маңызды қадам болады. Кәсіпорын жоғары қосылған құнға ие өнімдерді және басқа да өнімдерді шығарып, оларды Еуропаға, араб елдеріне және Оңтүстік-Шығыс Азияға экспорттауды жоспарлап отыр.

Dalian Hesheng Holding Group Co., Ltd. – ауыл шаруашылығында, инфрақұрылымдық инвестициялар мен құрылыста маманданған қытайлық жетекші компания. Кәсіпорын ауыл шаруашылығы өнімдерін терең өңдеу және тұрақты инновациялық шешімдер саласында озық технологияларға ие бола отырып, халықаралық жобаларда сенімді серіктес ретінде танымал.

Ақмола облысының әкімі Марат Ахметжановтың айтуынша, осы меморандумға қол қою халықаралық ынтымақтастықты кеңейтуге және Қазақстан мен Қытай арасындағы аграрлық саладағы экономикалық байланыстарды нығайтуға жаңа мүмкіндіктер тудырады.

«Бұл құжат ынтымақтастық көкжиегін кеңейтеді және еліміздің жетекші аграрлық өңірі ретіндегі позициямызды күшейтеді. Қол қойылған меморандум – Мемлекет басшысының 2024 жылғы 2 қыркүйектегі Қазақстан халқына жолдауында атап өткен жоғары дәрежелі экспорттық өнім болып табылатын астықты терең өңдеу зауытын салу бойынша ірі жобаны іске асырудың бастамасы. Бұл жоба сондай-ақ 1 млн тоннадан астам астықты нарықтық бағамен сатып алуға мүмкіндік беретіндіктен, ақмолалық аграршылар үшін де тиімді», – деді өңір басшысы.

Жобаны жүзеге асыру Ақмола облысының әлемдік нарықтағы позициясын нығайтуға, экспорт көлемін ұлғайтуға және Қазақстанның ауыл шаруашылығы секторында жаңа бағыттардың дамуына жағдай жасауға мүмкіндік береді.

Ақпарат көзі: ГУ «Аппарат акима Акмолинской области»