Көкшетауда халық ақыны Көкен Шакеевтің 100 жылдығына арналған «Көкшенің көк семсері – Көкен ақын» халықаралық айтысы өтті. Оған Қазақстанның және Қырғызстанның түрлі өңірлерінен келген айтыскерлер қатысты. Халықаралық жыр сайысында 18 ақын, жыршы, термеші және күйшілер өнер көрсетті.

Шығармашылық сайысқа қатысушыларды Ақмола облысының әкімі Марат Ахметжанов құттықтап, бүгінгі жыр додасы екі елдің тәуелсіздік жылдарындағы жетістіктерін, халқымыздың бай мәдени мұрасын және ұлттық өнерімізді дәріптеуге арналғанын атап өтті.

«Қасиетті Көкше жерінде басталған бүгінгі қазақ және қырғыз ақындарының өнер бәйгесі болашақта екі бауырлас елдің халқын одан әрі жақындастырып, рухани мұрамызды сақтау ісіне ықпал ететін елеулі оқиғаға айналады. Төл мәдениетіміз бен өнеріміз ұрпақтан ұрпаққа жалғасып, бауырлас қазақ пен қырғыз халқының мәдениеті дами берсін», – деп өңір басшысы тілегін білдірді.

Екі елдің мәдениет және өнер қайраткерлерінен құралған қазылар алқасын Қазақстанның еңбек сіңірген қайраткері, «Құрмет», «Парасат» ордендерінің иегері, Халықаралық ақындар, айтыс және жыршы-термешілер одағының төрағасы Жүрсін Ерман басқарды.

Халықаралық айтыстың жүргізушісі Қазақстан Республикасы Парламенті Мәжілісінің депутаты, айтыс ақыны Аманжол Әлтаев болды.

Қазақстан Республикасының Мәдениет және ақпарат министрі Аида Балаева қазақ және қырғыз халқының мәдениетін дәріптеген айтысқа құттықтау хат жолдады. Сондай-ақ, екі халық арасындағы достықты нығайтуға қосқан үлесі үшін қырғыз елінің үш өнерпазына «Мәдениет саласының үздігі» төсбелгісі табысталды.

Сайыс қорытындысы бойынша бірінші орынды Нұрлан Есенқұлов (Қазақстан) пен Азамат Болғонбаев (Қырғызстан) иеленді. Мақсат Ақанов (Қазақстан) пен Амантай Құтманәлиев (Қырғызстан) гран-при иегерлері атанды.

Ақпарат көзі: ГУ «Аппарат акима Акмолинской области»