Көкшетауда қаласының Тәуелсіздік алаңында Конституция күніне арналған мерекелік іс-шара өтті. Салтанатты шарада сөз сөйлеген Ақмола облысының әкімі Марат Ахметжанов Қазақстан Республикасының Конституциясы – еліміздің әрбір азаматының құқықтары мен бостандықтарының негізі, қоғамның тұрақтылығы мен демократиялық дамуының кепілі екенін айтты.

«Конституция күні мерекесінің қазақстандықтар үшін жылдан жылға маңызы артып келеді. Елімізде болып жатқан оң өзгерістерге барлығыңыз куә болып отырсыздар. Бұл жетістіктердің барлығына Конституцияның негізгі нормалары мен принциптері арқылы қол жеткізілді. Біз ел мен өңірді дамытуға бағытталған маңызды міндеттерді одан әрі шеше алатынымызға сенімдіміз», - деп атап өтті облыс әкімі.

Мереке аясында, жетім және ата-анасының қамқорлығынсыз қалған балалар, көп балалы отбасылар және халықтың әлеуметтік осал топтарындағы 22 отбасыға жаңа пәтердің кілті табысталды.  

Баспаналы болғандардың арасында 17 жыл пәтер кезегінде тұрған Динара Омарова да бар.

«Осы қуанышты күні Мемлекет басшысына көрсеткен көмегі үшін шын жүректен алғыс айтқым келеді. Менің отбасым 17 жыл кезекте тұрды. Енді біздің арманымыз орындалды, біздің өз баспанамыз бар, жарқын және жайлы» - деп бөлісті өз қуанышымен Динара Омарова.

Сондай-ақ, осындай айтулы күні облыс әкімі 24 медициналық жедел жәрдем көлігі мен 5 мектеп автобусының кілтін табыстады.

«Жаңа жедел жәрдем көліктері тек техника емес. Бұл біздің азаматтарымыздың денсаулығы мен әл-ауқатына қосқан үлесі. Бұл автомобильдер әрбір ақмолалыққа уақытылы медициналық көмек көрсетуді қамтамасыз ете отырып, халықтың игілігіне қызмет ететін болады» – деді М.Ахметжанов.

Салтанатты іс-шара аясында облыстың дамуына үлес қосқан бір топ ақмолалық «Құрмет» және «Еңбек Даңқы» ордендерімен, «Ерен еңбегі үшін» медальдарымен марапатталды.

Айта кетейік, Ата заңымыздың 29 жылдығында облыс орталығындағы Сарыарқа шағынауданында ерекше балаларға арналған балабақша пайдалануға берілді. Сонымен қатар, Бурабай ауданының Бурабай кентінде қосалқы станция, Зеленый бор ауылындағы Мәдениет үйі және спорт кешені де ел игілігіне берілді. Атбасар ауданындағы «BAXA SӦHNE»  ЖШС сұлы жармасын өндіру фабрикасы іске қосылды.

Ақпарат көзі: ГУ «Аппарат акима Акмолинской области»