Әйтеке бидің 380 жылдығына арналған «Әділ сөздің алдаспаны» атты Ақтөбе және Батыс Қазақстан облыстары арасында өткен командалық сайыста Ақтөбе облысының өнерпаздары жеңіс төрінен көрінді.

Бүгінгі дүбірлі өнер додасында көрермен қос өңірдің айтыскер, жыршы, термеші, дәстүрлі әнші, күйшілерінің өнерін тамашалады. 

Облысымыздың намысын Әділбек Сарин, Ақбота Қоянбайқызы, Нұрбол Жауынбаев, Жалғас Болатұлы, Аруна Керімбек, Жеңіс Елемесов, Қайырхан Жұбаниязов, Жәнібек Бейбітов, Темірхан Жетесов қорғады.

Ал Батыс Қазақстан облысының құрамасында Жансая Мусина, Талғат Мықи, Мұрадым Мирланов бастаған өнерпаздар болды.

Қос командадағы 18 өнерпаздың өнерін белгілі мемлекет және қоғам қайраткерлері, Мәжіліс депутаттары, ақындар, танымал айтыскерлер бағалады. «Айтыс ақындары мен жыршы-термешілердің халықаралық одағының» төрағасы, Қазақстанның еңбек сіңірген қайраткері Жүрсін Ерман төрағалық етті.

Шарада сөз алған Ақтөбе облысы әкімінің орынбасары Жолдас Батырхан өз өнерлерін көрсетіп, көрермен қошеметіне бөленген сайыс қатысушыларына алғысын айтты. Командалық айтыстың тақырыбына арқау болған Әйтеке бидің әділдік, бірлік және ел болашағы үшін жасаған игі істері қазақ халқының тарихында маңызды орын алатынын атап өтіп, оның өскелең ұрпаққа қалдырған мұрасын насихаттау ісі жалғаса беретінін сөз етті. Әйтеке бидің 380 жылдығы облыс аумағында кең көлемде тойланғанын дүйім жұртқа жеткізді.

Торқалы тойға орай ұйымдастырылған тартысты сайыста ақтөбелік команда БҚО-дан басым түсті.

Бұл командалық айтыс - биылғы жылы басталған, екі жылға созылатын ірі жоба. Бас-аяғы төрт кезеңнен тұрады. Бірінші кезеңге республика бойынша 20 команда қатысады, екінші кезеңге 10 команда өтеді. Осы 10 команданың ішінен балдық жүйе бойынша 4 команда үшінші кезеңге жолдама алады. Жеңіске жеткен 2 команда 2025 жылы Астана қаласында өтетін ақтық сайысқа қатысады. 

Командалық сайыстың құрылтайшылары: Айтыс ақындары мен жыршы-термешілердің халықаралық одағы, Ақтөбе облысының әкімдігі.

Ақпарат көзі: ГУ «Акимат Актюбинской области»