Ақтөбе облысының әкімі Асхат Шахаров облыс прокуроры Халидулла Дауешовпен бірге, «Жасыл дәліз» жобасының қатысушыларымен кездесті. Шарада аталған жобаны әрі қарай іске асыру мәселесі, бүгінде кәсіпкерлердің алдында тұрған проблемалар және оларды шешу үшін қабылданып жатқан шаралар талқыланды.

Басқосуда Мемлекет басшысының инвестициялардың жаңа толқынын тартуға, іске асырылып жатқан инвестициялық жобаларды сүйемелдеуге ерекше назар аударып жатқаны атап өтілді. Бұл тұрғыда Ақтөбе өңірінің көрсеткіштері жаман емес. Соңғы 3 жылда облыстағы инвестициялар көлемі 2,8 трлн теңгені құрады (2021 жылы – 817,1 млрд теңге, 2022 жылы - 960 млрд теңге, 2023 жылы – 1025,0 млрд теңге), ал сыртқы инвестициялардың үлесі 30%-ға ұлғайды. Инвестициялық ахуалды жақсарту және инвесторлардың құқықтарын қорғау үшін инвестициялық жобалардың іске асырылуын үйлестіру мен бақылауға жауапты инвестициялық штаб  құрылды.

Сонымен қатар, 2023 жылдан бастап Ақтөбе өңірінде кәсіпкерлер алдында тұрған әкімшілік кедергілерді жою және өңірде қолайлы бизнес-ортаны қалыптастырып, дамытуға бағытталған инвесторлар үшін «Жасыл дәліз» жобасы іске асырылуда. Өзара ынтымақтастық туралы тиісті меморандумға облыс әкімі Асхат Шахаров пен облыс прокуроры Халидулла Дауешов қол қойды. Кездесу барысында осы жобаны іске асырудағы оң нәтижелер сөз болды.

Облыс әкімі «Жасыл дәліз» жобасы инвесторларға рұқсат құжаттарын алу, жер учаскелерін беру, инфрақұрылыммен қамтамасыз ету, жалпы бюрократиялық кедергілерді еңсеру мәселелерін орталықтандырып, шешуге мүмкіндік бергенін атап өтті.

«Жасыл дәліз» жобасының арқасында инвесторларға жобаларын тіркеуден бастап объектілерді пайдалануға бергенге дейінгі барлық қажетті рәсімдерді жеделдетілген және жеңілдетілден өту мүмкіндіктері жасалды. Бизнеске мұндай қолдау оның аймақтағы дамуына айтарлықтай әсер етті. Бір жылдың ішінде бізде бюджетке түсетін түсімдер көбейді. Биыл бюджетке өңдеу өнеркәсібінен 89 миллиард теңгеге тікелей инвестиция тартылды. Біз оның көлемін арттыру міндетін қойып отырмыз. Мұның алғышарттары бар.

Қазіргі уақытта 27 компанияның 31 жобасын бақылауға алдық. Бұл ірі жобалар іске қосылса, мыңдаған жұмыс орны құрылады. Осы жобалар арқылы шағын және орта бизнесті одан әрі дамытамыз. Қосымша цехтар ашамыз, ірі кәсіпорындар үшін материалдар, қосалқы бөлшектерді жеткізуді жолға қоямыз. Өңірде толық қуаттылықта жұмыс істемейтін 13 кәсіпорын бар, олардың өндіріс қарқыны арттырылады. Біз үшін ең бастысы – отандық тауар өндірушінің жұмыс істеуі», - деді облыс әкімі.

Асхат Шахаров кездесуге қатысушыларды аймақтың инвестициялық ахуалын жақсарту үшін инвесторларға олардың жобаларын сүйемелдеуді және мемлекеттік қызметтерді алуға жәрдемдесуді жалғастыратындығына сендірді.

Шара соңында инвесторларға «Жасыл дәліз» жобасына қатысушылардың куәліктері табысталды. 27 бизнес өкілі өңірде 31 ірі жобаны іске асыруды жоспарлап отыр. Олардың арасында отандық кәсіпкерлерден бөлек, Ресей, Түркия, Қытай және АҚШ-тың бизнес иелері бар.

Ақпарат көзі: ГУ «Акимат Актюбинской области»