Қорғаныс министрі генерал-полковник Руслан Жақсылықовтың басшылығымен Аягөз гарнизонында өткен алқа отырысында 2024 жылғы қысқы оқу кезеңінің қорытындысы шығарылды.

Іс-шараға Қорғаныс министрлігі мен Бас штаб құрылымдық бөлімшелерінің, әскери жоғары оқу орындарының бастықтары, Қарулы күштер түрлерінің бас қолбасшылары, өңірлік қолбасшылықтар мен әскер тектерінің қолбасшылары қатысты. Күн тәртібіндегі мәселелерді талқылауға құрамалар мен әскери бөлімдердің командирлері, мекеме басшылары бейнеконференцбайланыс режимінде қосылды.

Алқа басталар алдында қорғаныс ведомствосының басшысы генерал-полковник Руслан Жақсылықов су тасқынына қарсы іс-шараларды өткізу кезінде ерекшеленген әскери қызметшілерге мемлекеттік наградалар табыс етті. Мемлекет басшысының Жарлығымен II дәрежелі «Айбын» орденімен Әскери-әуе күштері қолбасшысы басқармасының аға инспекторы полковник Қайрат Түгелов, «Жауынгерлік ерлігі үшін» медалімен подполковник Сәкен Шұғанов, майорлар Жәнібек Бекбаулиев, Асхат Сейілов және ефрейтор Асан Тілеубай марапатталды.

Қорғаныс министрі оларға сындарлы жағдайда көрсеткен батылдығы мен адалдығы үшін алғыс айтты.

– Су тасқыны жағдайын тұрақтандыруға 5 мыңнан астам әскери қызметші, 300-ден астам әскери техника мен армиялық авиацияның 18 бірлігі жұмылдырылды. Біз Президенттің тапсырмасы бойынша су тасқынымен күресуге өңірлерге қосымша күштер мен құралдар жібердік. Қиындықтарға қарамастан, олар қойылған міндеттерді абыроймен орындап шықты, – деп атап өтті Руслан Жақсылықов.

Отырыс барысында әскер өмірінің барлық мәселелері қаралды. Ең алдымен, Қарулы күштердің басты міндеті – жауынгерлік дайындықты қолдау, жеке құрамның жауынгерлік дағдылары мен басқару органдарының үйлесімділігін арттыру атап өтілді.

Әскери инфрақұрылымды жетілдіру шеңберінде құрылысы жеңіл конструкциялардан модульдік ғимараттар салу мүмкіндіктерін кеңейту бойынша жұмыс жүргізілуде. Бұл бюджет қаражатын үнемдеуге және объектілерді салу мерзімін қысқартуға мүмкіндік береді. Осыған байланысты Қорғаныс министрі Аягөз гарнизонында әскери инфрақұрылымды жақсарту бойынша атқарылған жұмыстарға оң баға берді.

Әскери тәртіп және әскери қызмет қауіпсіздігі мәселелері жеке қаралды. Бұрын белгіленген бағыт аясында командирлердің құқықтық тәртіпті сақтағаны үшін дербес жауапкершілігін күшейтуге осы бағытта тиісті жұмысты ұйымдастырмаған бірқатар командирлер мен олардың орынбасарларының атқаратын лауазымдарына сәйкестігі туралы мәселе қойылды.

Қорғаныс министрінің бірінші орынбасары – ҚР Қарулы күштері Бас штабының бастығы генерал-лейтенант Сұлтан Қамалетдинов жалпы қызметтің қорытындылары, жауынгерлік әзірліктің, жедел және жұмылдыру дайындығының жай-күйі туралы баяндады. Ол жедел дайындықтың негізгі күш-жігері жауынгерлік жұмысты ұйымдастыруда әскери басқару органдарының дағдыларын жетілдіруге, операциялардың әртүрлі түрлерінде бірлескен міндеттерді орындау кезінде ведомствоаралық және түраралық өзара іс-қимыл деңгейін арттыруға бағытталғанын атап өтті.

Жұмылдыру дайындығына қатысты Қорғаныс министрінің бірінші орынбасары оның жалпымемлекеттік сипатына тоқталды.

– Әскери басқару органдары лауазымды адамдарының әскерлерді жұмылдыруды жоспарлаудағы дағдыларын жетілдіруге баса назар аударылды. Жұмылдыру дайындығы іс-шараларының қарқындылығы 60%-ға өсті. Есепті кезеңде барлығы 23 командалық-штабтық оқу-жаттығу мен жаттығу өткізілді, – деп қорытындылады генерал-лейтенант С. Қамалетдинов.

Алқа соңында Қорғаныс министрі генерал-полковник Руслан Жақсылықов жазғы оқу кезеңіне міндеттер қойды. Онда белгілеген басымдықтардың ішінде әскерлердің дағдарыстық жағдайларға ден қоюға тұрақты дайындығын қамтамасыз ету, жұмылдыру өрістету міндеттерін шешу үшін ресурстарды дайындау және жинақтау, Қарулы күштерді дамыту жөніндегі іс-шараларды жоспарлы орындау бар.

Халықаралық ынтымақтастық және әскери қызметтің қауіпсіздігін қамтамасыз ету шеңберінде оқу-жаттығуларды сапалы дайындау және өткізу қажеттілігіне назар аударылды.

Ақпарат көзі: Министерство обороны Республики Казахстан