Жаңасемей ауданы Шүлбі кентінде көпсалалы спорт кешенінің салтанатты ашылуы өтті. Жобаны қордың корпоративтік әлеуметтік жауапкершілігі аясында «Samruk-Kazyna Trust» бірыңғай қайырымдылық операторы жүзеге асырды.

Жалпы ауданы 1600 шаршы метрді құрайтын спорт кешеніне шағын футбол алаңы, көрермен орны, волейбол және баскетбол алаңдары, теннис корты, екі жолақты жүгіру жолы және бокс рингтері кіреді. Сондай-ақ нысан барлық қажетті спорттық құрал-жабдықтармен қамтамасыз етілген.Облыс әкімінің орынбасары Жасұлан Сәрсебаев «Самұрық-Қазына» қорына өңірдің спорт инфрақұрылымын дамытуға қосқан үлесі үшін алғысын білдірді.

«Экономикалық және әлеуметтік жетістікке жету үшін біздің өңірде рухани байлық – денсаулықтың болуы аса маңызды. Ел Президенті Олимпиада чемпиондарымен кездесуінде әр аймақта олимпиадалық спорт түрлерін дамыту басты міндеттердің біріне айналғанын басып айтты. Өңіріміздің тұрғындарының бұқаралық спортпен шұғылданып, салауатты өмір салтын ұстанатыны қуантады. Болашақта бұл кешен облыс инфрақұрылымының жетекші бөлігі болып қала бермек», - деді Жасұлан Сәрсебаев.

«Самұрық-Қазына» қорының басқарма төрағасы Нұрлан Жақыпов қордың басты мақсатына тоқталды.

«Самұрық-Қазына» қоры көпшілік арасында салауатты өмір салтын насихаттап, спортмен айналысуға шақырады. Мен өзім де спортмен айналасқанды ұнатамын және түрлі марафондарға белсенді қатысамын. Спорт нысаны салынған Шүлбі ауылынан болашақ олимпиада чемпиондары шығуы мүмкін. Бұл спорт кешені жастардың талантын ашып, биіктерден көрінуге мүмкіндік береді деп сенемін», - деді Нұрлан Жақыпов.

Айта кетейік, облыста 500-ден астам спорт нысаны болса, өткен жылы ғана 10 жаңа нысан ашылды. Тағы 5 нысан құрылыс жұмыстарының соңғы сатысында.

Ақпарат көзі: Абай облысының әкімдігі