Жас патриоттар жиынына еліміз бен Әзербайжан, Беларусь, Қырғызстан, Ресей және Өзбекстан мемлекеттерінен құрамына 750 ұл мен қыз кіретін 50 команда қатысып жатыр.

АК-74 автоматын толық бөлшектеп, құрастыру, Smart sarbaz жас өнертапқыштар байқауы, «Айбын дарыны» зияткерлік ойыны және «бес тас», «асық ату», «ләңгі тебу» секілді ұлттық спорт түрлерінен жарыстар өтті.

Кәсіптік бағдар беру кездесуінде «Айбын» жиынына қатысушылар Қазақстан Қарулы күштеріне, басқа да әскерлер мен әскери құралымдарға кадр дайындайтын жоғары оқу орындарымен танысты.

Радиоэлектроника және байланыс әскери-инженерлік институтының, Сағадат Нұрмағамбетов атындағы Құрлық әскерлері әскери институтының, Талғат Бигелдинов атындағы Әуе қорғанысы күштері әскери институтының, Ұлттық қауіпсіздік комитеті Шекара академиясының, Қаржы мониторингі академиясының (AML Academy) және Алматы қаласы Төтенше жағдайлар департаментінің өкілдері жастарға бейінді жоғары оқу орындарында оқу тәртібі мен мамандықтар туралы егжей-тегжейлі айтып берді.

Бүгін еліміз әскери-патриоттық клубтарының, «Жас ұлан» әскери мектептерінің және шет мемлекеттердің спортшылары пневматикалық мылтықтан оқ атуды, белтемірге (ұлдар) тартылу және денені жатып (қыздарда) көтеруді орындады.

Жарыстың бас төрешісі полковник Арман Әбеуов түсіндіргендей, әскери-қолданбалы спорт түрлерінен өтетін жарыстардың нәтижесі қатысушылардың әрбір санаты бойынша жарыстың барлық түрінен алған орындардың ең төменгі көрсеткішімен айқындалатын болады. Бірінші топқа өңірлердің әскери-патриоттық клубтары, екінші топқа әскери бөлімдер мен мекемелердің жанындағы әскери-патриоттық клубтар, үшінші топқа «Жас ұлан» республикалық мектептері, «Арыстан» мамандандырылған лицейі, әскери мектеп-интернаттар, төртінші топқа шет мемлекеттердің әскери оқу орындары мен әскери-патриоттық клубтары және Сағадат Нұрмағамбетов атындағы әскери колледж жатады.

Конкурстар мен жарыстардың қорытындысы бойынша әр топта бірінші орын алған командалар «Күшіміз бірлікте» әскери-далалық тактикалық ойындарына қатысып, Бас жүлде иегері анықталады.

Ақпарат көзі: Министерство обороны Республики Казахстан