1 қазан халық даналығы мен салт-дәстүрдің жалғаушылары, ардақты ата-әжелеріміздің жылы да, шынайы мерекесі – Қарттар күні. Осыған орай аға буын өкілдеріне шығармашылық ұжымдардың қатысуымен мерекелік бағдарлама ұйымдастырылды.

Облыс әкімі Нұрлан Ұранхаев өз сөзінде ұрпақтар сабақтастығы мен үлкенді құрметтеудің маңызына тоқталды.«Аға буын қашанда жастарға үлгі-өнеге. Өткен тарихымызға, мәдени мұрамызға қамқорлық жасау – қазақ халқына тән асыл қасиет. Қарттарымыз – әр шаңырақтың тірегі, елдің ұйытқысы. Сіздердің өмір жолдарыңыз, бай тәжірибелеріңіз бен білімдеріңіз баға жетпес байлық. Біз сіздердің жетістіктеріңізбен мақтанамыз. Сіздерге зор денсаулық, ұзақ ғұмыр, отбасыларыңызға амандық тілеймін!» – деді Нұрлан Ұранхаев.

Айта кетейік, облыстағы қарттарды әлеуметтік қолдаудың негізгі бағыттарының бірі – мамандандырылған қызмет көрсету. Облыс орталығында зейнеткерлер денсаулығын нығайтып, бос уақытын тиімді өткізуге мүмкіндік беретін «Белсенді ұзақ өмір сүру» орталығының екі филиалы жұмыс істеуде. Орталықтың негізгі мақсаты – егде жастағы адамдарды әлеуметтендіру, олардың мәдени, шығармашылық және спорт салаларындағы белсенділігін арттыру.

Сонымен қатар, облыста аға буынға әлеуметтік қолдау көрсететін Ардагерлер орталығы бар. Сондай-ақ, Абай облыстық ардагерлер кеңесі жанынан салт-дәстүрді жаңғырту, өскелең ұрпақты тәрбиелеу, ана мен баланы қорғау бағытында жұмыс істейтін «Әжелер алқасы» тобы құрылды.

Ақпарат көзі: Абай облысының әкімдігі