Бүгін қаламыздың озық білім ордаларының бірі Абай атындағы №1 мектеп-гимназиясының оқушыларымен қала әкімі Ернат Бәзіл және қалалық полиция басқармасының бастығы, полиция подполковнигі Ернар Ширбаев кездесу өткізді.

Тағылымға толы жиында кәмелетке толмағандар арасындағы қылмыстың алдын алу мен жасөспірімдердің бос уақытын тиімді пайдалану мәселелері сөз болды. Сондай-ақ, спорт, мәдениет және білім салаларында жетістікке жетудің маңызды қадамдары да айтылды.

Қала әкімі оқушыларды бойдағы дарынын шыңдауға арналған түрлі үйірмелерге қатысуға шақырып, өз өмірінде болған қызықты жағдайларымен және мақсат қойып оған талпыну керектігін айтты.

«Өздеріңізге белгілі, біздің өңірімізде облыс әкімі Бейбіт Исабаевтың бастамасымен «Әдеп-құқық жұмысы жөніндегі ментор» жобасы қолға алынып, бүгінде облыс бойынша 120, ал қала бойынша 31 ментор жұмыс істеуде. Олар 9 бағытта сараланған тиімді әдіс-тәсілдермен мектеп оқушыларымен жұмыс жасап жатыр. Бұл жоба әлі де өз жемісін береді деп сенемін», - деді қала әкімі Ернат Бәзіл.

Айта кетейік, Абай атындағы №1 мектеп-гимназиясында 1674 оқушы білім алуда, оларға 125 білікті ұстаз қызмет көрсетуде.

Ақпарат көзі: ГУ «Аппарат Акима города Талдыкоргана»