Республика күнін мерекелеуге орай елорда тұрғындары арасында ұлттық мерекенің тарихына арналған блиц-сауалнама жүргізілді, деп хабарлайды Астана әкімдігінің ресми сайты.

«Астана жастары» тобының еріктілері Есіл өзенінің жағалауындағы жаяу жүргіншілер көшесінде жергілікті тұрғындар мен қонақтар арасында сауалнама жүргізді. Қатысушыларға мемлекеттің қалыптасуына қатысты негізгі мәселелер бойынша сұрақтар қойылды.

«Бүгін біз азаматтар арасында Республика күні туралы не білетіні жайлы сауалнама жүргізіп жатырмыз. Біз бес бөлім бойынша сұрақтар қоямыз: мысалы, бұл мереке қашан тойланады, онымен қандай дәстүрлер байланысты, сонымен қатар Республика күнінің мәні туралы тұрғындардың пікірін білеміз. Іс-шарамыздың мақсаты – бұл мерекенің маңыздылығын барынша паш ету», - дейді «Астана Жастар» волонтері Аружан Дәулетиярова.

Астаналықтар сауалнамаға қызығушылықпен қатысты. Дұрыс жауаптары үшін сыйлықтарға ие болды.

Ұйымдастырушылар мұндай шаралар мерекелік көңіл-күй сыйлап қана қоймай, бірлік рухын нығайтып, отансүйгіштікке тәрбиелейтінін атап өтті.

Естеріңізге сала кетейік, Республика күніне орай Астанада 100-ден астам мәдени-бұқаралық, білім беру, спорттық және әлеуметтік іс-шаралар, оның ішінде мерекелік концерттер, көрмелер, дөңгелек үстелдер, ұлттық спорт түрлері бойынша турнирлер және т.б. өткізу жоспарланған.

Ақпарат көзі: ГУ «Аппарат акима города Астана»