Бүгін Астана күні мерекесі қарсаңында Алакөл ауданы Ақжар ауылдық округі Қоңыр ауылында жаңадан салынған блок-модульді медициналық нысанның құрылысы аяқталып, ауыл тұрғындарына қолданысқа берілді, - деп хабарлайды Жетісу облысы әкімінің баспасөз қызметі.

Алакөл ауданы әкімдігінің мәліметіне қарағанда, Қоңыр ауылы аудан орталығынан 78 шақырымда орналасқан. Халық саны 706 адамды құрайды.  Бұған дейін ауыл тұрғындары 1970 жылы салынған ғимаратта ем-дом алса, бүгінде бұл ғимараттың тозығы жеткен.

«Біз бүгінгі күнге дейін шағын бөлмесі бар ескі ғимаратта дәрігердің қабылдауында болып келдік. Ол жерде жатып емделуге мүмкіншілік мүлдем болмады. Ал қазір заман талабына сай медпункт ашылып жатқанына ауылдықтар дән ризамыз. Әсіресе, зейнеткерлерге қолайлы болды. Халықтың игілігіне болсын! Ауылымыз көркейіп жатыр», - деді ауыл ақсақалы Б. Ермусин. 

Салтанатты ашылу рәсімінде аудан әкімінің орынбасары М. Төлеужанов ауыл тұрғындарын құттықтады. Еңбек ардагері Қ. Тастанбеков ақсақалдың бата тілегімен лентасы қиылып, мекеме жұмысын бастады.

Атап өтсек, блок-модульді медициналық нысан Алакөл ауданы әкімі аппаратының тапсырысы негізінде мердігер «QazDamuConstruction» ЖШС 33 млн. теңгеге салды. Ғимараттың жалпы аумағы 103 шаршы метрді құрайды. Аталмыш ғимаратта 6 бөлме бар. Заманауи медициналық құрал-жабдықтармен қамтылған. Бір мезетте 15 емделушіге алғашқы медициналық көмек көрсете алады. Тұрғындарға  алғашқы медициналық-санитарлық көмек, екпе егу, скрининг, акушерлік және ЭКГ аппаратына жүрек қағысын тексеру, жедел және шұғыл медициналық көмек қызметтерін көрсетеді.

Мекемеде штаттық бірлікке сәйкес 3 қызметкер қызмет етеді.

Алакөл ауданы әкімдігінің мәліметіне қарағанда, былтыр Алакөл ауданындағы елді мекендерде заманауи үлгідегі 1 фельдшерлік акушерлік пункт, 2 медициналық пункт, 3 блок-модульді кешен салынып, халыққа сапалы қызмет етуде.

Еске салсақ, Жетісу облысында денсаулық сақтау саласындағы инфрақұрылымды дамыту мақсатында биылдың өзінде 94 нысан тұрғызылады, соның 59-ы «Ауылдық жерлердегі денсаулық сақтауды жаңғырту» Ұлттық жобасы шеңберінде салынады, сол қатарда дәрігерлік амбулатория, фельдшерлік-акушерлік пункт, медпункт бар. Бұл ретте нысандардың 27-сі блокты-модульді құрылыс болады.

Жетісу облысы әкімінің баспасөз қызметі.

Фотосуреттер: Алакөл ауданының әкімдігі.

Ақпарат көзі: Жетісу облысының әкімдігі