АЛМАТЫДА ЭНДАУМЕНТ-ҚОРЛАРДЫҢ II КЕЗДЕСУІ ӨТТІ

  Республикалық физика-математика мектебі (РФММ) базасында Қазақстанның эндаумент-қорларының II кездесуі өтті. Кездесуге эндаумент-қорлардың өкілдері, ҚР Парламенті Мәжілісінің депутаттары, ҚР ҒЖБМ, жоғары оқу орындарының өкілдері мен әлеуметтік саланың мүдделі ұйымдарының, қаржы нарығының мамандары және сарапшылардың кең ауқымы қатысты.

  Іс-шараның басында Қазақстанның эндаумент-қорлары және әртүрлі елдердегі, әсіресе АҚШ пен Ресейдегі эндаументтер жұмысы бойынша 2023 жылы жаңартылған статистика ұсынылды. Содан кейін қатысушылар Президент тапсырмасы бойынша ҚР ҒЖБМ әзірлеген және осы жылдың наурыз айында Парламент Мәжілісінің қарауына енгізілген «Нысаналы капитал қорлары (эндаумент-қорлар) туралы» Заң жобасына депутаттардың негізгі мәселелері мен ұсыныстарын талқылады. Білім беру және әлеуметтік салалардың тұрақтылығы мен дамуының көзі ретінде эндаумент-қорларға қосарланған салық салуды болдырмау үшін жекелеген мәселелерді нақтылау қажеттілігіне ерекше назар аударылды.

  ЖОО жанындағы эндаумент-қорлар «білім беру экожүйесін дамытудың негізгі буыны» деп саналады. Сонымен қатар қатысушылардың пікірінше, заңның қабылдануы мемлекет пен меценаттардың серіктестігін дамыту бағдарламасымен бірге елдің бүкіл әлеуметтік саласының дамуына қуатты серпін береді, қоғам мен бизнестің азаматтық белсенділігін қолдау үшін тұрақты негіз жасайды, қаржы нарығында ұзақ мерзімді инвесторлардың жаңа түрін қалыптастырады.

  Әлемде эндаументтер тек университеттер мен мектептерді ғана емес, сонымен қатар медицина, мәдениет, балалар мен кәсіптік білім, спорт, экологиялық жобалар, қайырымдылық – адами капиталды дамытудың барлық салаларын және белгілі бір адамды қолдау үшін кеңінен қолданылады. Бүгінде Қазақстанда саланы дамыту үшін біріккен 20-дан астам эндаумент-қор жұмыс істейді.

  Кездесудің екінші бөлімінде «Аврора-ата» корпоративтік қорының Қамқоршылық кеңесінің төрағасы қоғамдастық өкілдеріне арналған фандрайзинг мәселелері бойынша семинар және мастер-класс өткізді.

Ақпарат көзі: Қазақстан Республикасы Ғылым және жоғары білім министрлігі