АЛМАТЫДА ОРТАЛЫҚ АЗИЯДАҒЫ ТҰРАҚТЫ ИННОВАЦИЯЛАРҒА АРНАЛҒАН СТРАТЕГИЯЛАР ТАЛҚЫЛАНДЫ

  Алматыда CASIB Жобалық кеңсесінің демеушілігімен Германия Ғылым министрлігінің «CLIENT II – Орталық Азиядағы тұрақты инновациялар үшін халықаралық серіктестік» бағдарламасы бойынша қорытынды конференция өтті.

  Германия мен Орталық Азиядағы ғылыми және инновациялық ұйымдар арасындағы серіктестік жобасының қорытынды конференциясына Ғылым қоры өкілдері қатысты. Іс-шара соңғы сегіз жылдағы жұмыстың негізгі нәтижелерін талқылау және одан әрі дамудың стратегиялық бағыттарын анықтау үшін сарапшылар мен жобаға қатысушыларды біріктірді.

  Конференция CLIENT II жобасының қызметі мен жетістіктеріне кең шолу жасау, сондай-ақ жоба қызметін жалғастыру және оның нәтижелерін коммерцияландыру мүмкіндіктері туралы диалог үшін алаңы болды.

  Жобаларды дамыту және коммерцияландыру перспективаларына арналған панельдік пікірталасқа ерекше назар аударылды. Спикер ретінде Ғылым қоры төрағасының орынбасары Әлия Сембаева баяндама жасады. Спикер Қордың ғылыми әзірлемелерді коммерцияландыруға бағытталған ағымдағы бастамалары, сондай-ақ халықаралық ынтымақтастықты кеңейту стратегиялары туралы ақпаратпен бөлісті. Ғылым қоры жаһандық мәселелерді шешудегі ұжымдық күш-жігердің маңыздылығын айта отырып, халықаралық ынтымақтастықты одан әрі қолдауға және дамытуға дайын.

  Айта кетейік, 2017 жылы басталған CLIENT II жобасы климат, қоршаған орта, ресурстар және энергетика секторларындағы негізгі мәселелерді шешетін Орталық Азия мен Моңғолияның бірлескен 15 жобасының бастамашысы. Жобаларды бірлесіп қаржыландыру, оның ішінде Германияның Білім және ғылыми зерттеулер министрлігінің 20 миллион еуроға жуық қомақты үлесі аталған жобаларды жүзеге асыруда шешуші рөл атқарды.

Ақпарат көзі: Қазақстан Республикасы Ғылым және жоғары білім министрлігі