Ағымдағы жылдың 20-22 қарашасы аралығында Астанада Қазақстан Республикасының Сыбайлас жемқорлыққа қарсы іс-қимыл агенттігімен бірлесіп Шығыс Еуропа және Орталық Азия елдері үшін ЭЫДҰ сыбайлас жемқорлыққа қарсы желісі (ЭЫДҰ СЖҚЖ) ұйымдастырған халықаралық сарапшылармен кездесу өткізілді.

Іс-шара ЭЫДҰ СЖҚЖ іске асыратын жемқорлыққа қарсы тақырыптық жоба шеңберінде өткізілді, оның мақсаты жемқорлық фактілерін тергеудің сапасы мен тиімділігін арттыруға, сондай-ақ тәркілеу шаралары мен санкцияларды қолдануға жәрдемдесу болып табылады.

Қазақстан тарапынан талқылауға Президент Әкімшілігінің, Cыбайлас жемқорлыққа қарсы іс-қимыл агенттігінің, Парламенттің, Бас прокуратураның және басқа да мемлекеттік органдардың, Парламентаризм Институтының, «Атамекен» ҰКП, сондай-ақ ғылыми қоғамдастықтың өкілдері қатысты.

Агенттік Төрағасы Асхат Жұмағали кездесуді ұйымдастырғаны үшін ЭЫДҰ СЖҚЖ басшысы Ольга Савранға және халықаралық сарапшыларға алғысын білдіріп, Қазақстанның жемқорлыққа қарсы саясатын, оның ішінде ЭЫДҰ СЖҚЖ Сыбайлас жемқорлыққа қарсы күрес жөніндегі Стамбул іс-қимыл жоспарының мониторингінің 5-ші раунды шеңберінде одан әрі жетілдірудің маңыздылығын атап өтті.

Қатысушыларға құттықтау сөз сөйлеген АҚШ Елшісі Д. Розенблюм ЭЫДҰ бірлескен жобалары арқылы халықаралық ынтымақтастық пен әріптестіктің негізгі рөлін атап өтіп, Қазақстанның жемқорлыққа қарсы реформаларына қолдау білдірді.

Кездесу барысында заңды тұлғалардың жемқорлық үшін қылмыстық жауаптылығын енгізу мәселелері, активтерді қайтару, тәркілеу және жемқорлық істері бойынша санкциялар мәселелері бойынша зерттеу нәтижелері сараптамалық талқылаудың жекелеген тақырыптары болды.

Сарапшылар халықаралық тәжірибені ұсынып, заңды тұлғалардың жауапкершілігін реттеу тәсілдерімен, оның ішінде қолданыстағы әкімшілік шаралар жүйесін, оны күшейту жөніндегі заңнамалық бастамалармен, сондай-ақ бизнестің ашықтығы мен парасаттылығын арттыруға бағытталған баламалы шаралармен таныстырды.

Қатысушылар ЭЫДҰ елдерінің озық тәжірибелерін және ұлттық ерекшеліктерін ескере отырып, заңнаманы одан әрі жетілдіруді талқылады.

Арнайы күн Сыбайлас жемқорлыққа қарсы күрес жөніндегі Стамбул іс-қимыл жоспары шеңберінде қазақстандық заңнама мониторингінің 5-раундын бағалау нәтижелерін таныстыруға арналды.

ЭЫДҰ сарапшылары Қазақстанның жемқорлыққа қарсы іс-қимыл саласындағы, оның ішінде сыбайлас жемқорлыққа қарсы саясаттың институционалдық негізін нығайту және құқықтық тетіктерді дамыту сияқты бағыттар бойынша ілгерілеуін атап өтті.

Сонымен қатар, ақпараттандырушыларды қорғауды, мемлекеттік сатып алулардың ашықтығын, сондай-ақ сыбайлас жемқорлыққа қарсы органның, прокуратура мен сот органдарының тәуелсіздігін нығайтуды қоса алғанда, одан әрі жетілдіруді талап ететін аспектілер бөлінді.

Сонымен қатар, ЭЫДҰ тарапынан олардың ұсынымдарын іске асыру бойынша техникалық көмек мәселелері талқыланды.

Қазақстандық тарап жемқорлыққа қарсы ұлттық саясатты іске асыру кезінде негізгі бағыттарының бірі халықаралық стандарттарды енгізу болып табылатын терең талдау мен ұсынымдар үшін сарапшыларға алғысын білдірді.

ЭЫДҰ-мен бірлескен жұмыс Қазақстанның құқықтық жүйесін нығайту және қоғамның билік органдарына деген сенімін арттыру жолындағы маңызды кезең болып табылады.

ТЕЛЕАРНАЛАР ҮШІН ВИДЕО: https://disk.yandex.kz/d/y4Myr13eSifS1g_ ❗️Егер Сіз жемқорлық фактілеріне тап болсаңыз, 1424 нөмірі арқылы немесе @antikorkz_bot Telegram-боты шұғыл хабарлаңыз.

Ақпарат көзі: Агентство Республики Казахстан по противодействию коррупции